Tramp kiyäwe Yaqın Könçığışqa bara

AQŞ dӓwlӓt başlığı Donal’d Trampnıň kiyӓwe hӓm başkiňӓşçese Jared Kuşnernıň bu atnada Yaqın Könçığışqa barıp, İzrail prem’yer-ministrı Binyamin Netanyaxu hӓm fӓlӓstin ilbaşı Mӓxmüt Abbas belӓn küreşep söylӓşӓçӓge belderelgӓn.

Aq Yort süzçese Sin Spayser Amerikan mediasında urın alğan xӓbӓrlӓrne döres dip belderep, Kuşnernıň bu atnada Yaqın Könçığışta tınıçlıq urnaştıru qısalarında töbӓkkӓ sӓfӓr yasayaçağın ӓytkӓn.

Spayser sӓfӓr belӓn bӓyle bularaq centekle mağlümat birergӓ telӓmӓsӓ dӓ, Kuşnerıň çӓrşӓmbe könne başta Qudüs-Yerusalimda İzrail prem’yerı Netanyaxu belӓn soňınnan Yordannıň könbatış üzӓnlegeneň Ramallah şӓhӓrendӓ Fӓlӓstin ilbaşı Abbas belӓn söylӓşü ütkӓrӓçӓge citkerelgӓn.

Trampnıň xalıqara söylӓşü maxsus wӓkile Djeyson Grinblat ta qatnaşaçaq sӓfӓrdӓ AQŞ citӓkçelegeneň Yaqın Könçığışta tınıçlıq urnaştıru mӓs’ӓlӓsendӓ alğarışnıň tӓêmin itelüe öçen tırışlıq quyuı kötelӓ.