Ruhani - Mogherini söyläşüe

Awrupa Berlegeneñ tışqı mönäsäbätlär häm iminlek säyäsäte yuğarı wäkile Federika Mogherini berlekneñ İran belän iqtisadi mönäsäbätlärne üsterü mäs’äläsendä täwäkkäl buluın äytkän.

Süriyä krizisına çişeleş êzläw maqsatı belän İranğa kitkän Mogherini däwlät başlığı Xäsän Ruhani belän başqala Tähranda küreşep söyläşkän.

İran ilbaşı idaräsennän yasalğan açıqlawğa kürä söyläşüdä Awrupa-Berlege – İran arasındağı ike yaqlı mönäsäbätlär belän ber rättän Süriyä krizisı häm regional’ mäs’älälär qaralğan.

Ruhani Süriyä häm Ğiraqtağı terrorçılıq belän citdi räweştä köräş alıp barılmağan oçraqta Tönyaq Afrikağa qadärge töbäktä qayber terrorçı däwlätlärneñ barlıqqa kilä alacağın äytkän.

Ruhani Awrupa Berlegeneñ terrorçılıqnı xuplağan illärgä dä basım yasawın sorağan.

İle belän tözelgän atom-töş kileşügä dä tuqtalğan Ruhani kileşüneñ ğamälgä kertelüendä qayber qıyınlıqlarnıñ çığuın beldergän.

Ruhani İrannıñ kileşüne ütäwen citkerep, şul uq totışnı qarşı taraftan da kötülären äytkän.

Mogherini dä Awrupa Berlegeneñ atom-töş kileşügä bäyle buluın citkergän.

Mogherini İran belän iqtisadi mönäsäbätlärgä ähämiyät birülären citkerep: “Awrupa Berlege şul uq waqıtta urtaq mänfäğatlärebezne saqlaw öçen İran belän arasındağı iqtisadi mönäsäbätlärne dä üsterü mäs’äläsendä täwäkkäl,” – digän.