"DEAŞ" 200 keşene ütergän
Terrorçılarınıñ 550 ğailäne canlı qalqanı itep qullanaçağı citkerelgän
Ğiraqnıñ ikençe zur şähäre Musulnı “DEAŞ” terror oyışmasınnan qotqaru operaśiyalärendä oyışmanıñ şähärdä üz saflarında suğışmawçı 200 keşene üterüe däğwa itelgän.
Ninova xalıq ışanıçlısı İntisar äl-Cuburi soñğı berniçä köndä “DEAŞ” tarafında suğışudan baş tartqan 200 keşeneñ terrorçılar tarafınnan üterelüen açıqlağan.
Cuburi üterülärneñ Musul törle töbäklärendä başqarıluın häm näyetlärneñ ğailälärenä tapşırılmawın äytkän.
Amerikan CNN İnternational kanalı da “DEAŞ” terror oyışmasınıñ yäkşämbe könne Musulda 284 keşene üterüen citkergän ide.
Xäbärdä bul’dozerlar belän kümäk ziratlarda cirlängän qorbannar arasında balalarnıñ da buluı belderelgän.
BMO keşe xoquqların saqlaw räsmi zatları da aldağı könne “DEAŞ” terrorçılarınıñ Musulğa bäyle awıllardan kim digändä 550 ğailäne canlı qalqanı itep qullanu öçen üz kontrollärendäge töbäklärgä alıp kitüen açıqlağan ide.
Bu arada Musulnı “DEAŞ” terror oyışmasınnan qotqaru operaśiyaseneñ 8nçe könendä Ğiraq armiyase Kayyara ilçäse tirä-yağında urnaşqan 9 awılnı terrorçılardan qotqarğan.
Alıp barıluçı operaśiyalärdä “DEAŞ” äğzase bulğan 299 terrorçı üterelgän, bomba töyälgän 20 transport çarası belän 45 bomba da yuqqa çığarılğan.
