Ğarasat zur zıyan sala
Florida, Georgia, Tönyaq häm Könyaq Karolinada ğadättän tış xäl iğlan itelgän
Karaip illäre tarixınıñ iñ qurqınıç tabiği afätlärennän Metyu ğarasatı Gaiti, Kuba häm Dominikka zur zıyan salğan.
Gaitida 842 keşeneñ ğomeren özgän ğarasat Amerika Quşma Ştatlarınıñ könyaq könçığış yar buylarına kilep citkän.
Florida, Georgia belän Tönya häm Könyaq Karolina ştatlarında ğadättän tış xäl iğlan itelgän.
Êvakuaśiya çaqıruı belän meñnärçä keşe yulğa çıqqan, avtutrassalarda ozın çiratlar payda bulğan.
Azıq-tölek zapasın yasarğa telägän meñnärçä keşe dä kibetlärgä ağılğan.
Tizlek belän kilüçe ğarasat köçle yawım-töşem häm cil dä alıp kilgän.
Dönyanın iñ fäqir illärennän berse bulğan Gaitida tormış tuqtap qalğan diyärlek.
Küperlärne cimergän, tübälärne oçırğan ğarasat Jeremie şähärendä toraq punktlarınıñ 80%ın yuqqa çığarğan.
Berläşkän Millätlär Oyışmasınıñ Humanitar yärdäm koordinaśiya ofisı 350 meñ keşeneñ aşığıç yärdämgä ixtıyacınıñ buluın açıqlağan.
1 million yarım tiräse keşe êvakuaśiyalängän Kubada tuqtamıyça yawğan yañğır cir şuışuın kiterep çığarğan.
Baham utrawlarında ağaçlar häm êlektr bağanaları cimerelgän, ênergiya liniyalärendä zıyan barlıqqa kilgän.
Dominik Cömhüriyätendä 36 meñnän artıq keşe öylären buşatqan.
Metyu ğarasatınıñ infra qızıl kamera linzası qullanılıp, töşerelgän iyärçen räseme dä qurqu uyatqan.
Gaiti östendäge ğarasat räsemeneñ baş söyägenä oxşawı iğtibarnı cälep itkän.
