Rusiyä Yanukoviçnı Ukrainağa tapşırmayaçaq
Ukraina elekke däwlät başlığı, premyer-ministr häm elekke finans ministrın kire sorıy
Başprokuror Yuriy Çayka Ukrainada citäkçelekkä qarşı uzğan yılnı oyıştırılğan çaralar waqıtında ilennän Rusiyägä kitkän elekke däwlät başlığı Viktor Yanukoviçnıñ tapşırıluı belän bäyle taläpkä tiskäre cawapnıñ bireläçägen açıqlağan.
Yuriy Çayka Rusiyäneñ qanunnar cıyılması häm xalıqara xoquq dokumentlarınıñ mäxkämädä bulğan keşelärneñ kire tapşırıluın küzdä totmawın äytkän.
Ukraina başprokurorı Vitaliy Yarema 6nçı fevral könne Ukraina parlamentı mömbärennän Rusiyä başprokuraturasına möräcäğat itep, elekke däwlät başlığı Yanukoviç, elekke Premyer-ministr Nikola Azarov häm elekke Finans ministrı Yuriy Kolobovnıñ kire tapşırıluın sorağan ide.
Viktor Yanukoviçnıñ Ukrainanıñ Awrupa Berlege belän partnerlik kileşüen 2013nçe yılnıñ noyabr ayında imzalamawınnan soñ başqala Kiyevda protest çaraları başlanğan ide.
Elekke citäkçelekneñ protestlarnı qırıs räweştä bastıru kereşüennän soñ iminlek köçläre belän rizasızlıq belderüçelär arasında bäreleşlär çıqqan ide.
Viktor Yanukoviç 2014nçe yılnıñ 21nçe fevral könne ildän kitep, Rusiyägä kitkän. Ukrainada isä waqıtlı xökümät qorılğan, Parlament başlığı Aleksandr Turçinov däwlät başlığı wäkile bulıp saylanğan ide.
