Awraziya Cömhüriyätläreneñ kön tärtibendäge waqıyğalar

21-22 may könnärendä Azärbaycan däwlät başlığı İlham Äliyev Litvağa räsmi säfär yasadı. Litva prezidentı Gitanas Nauseda häm İlham Äliyev arasında kiñ qırlı söyläşü uzdı. Söyläşüdän soñ taraflar arasında 3 kileşü imzalandı. Säfär qısalarında ike il liderları qatnaşında Litva-Azärbaycan Êş Forumı oyıştırıldı. Azärbaycan ilbaşı Litva prem’yer-ministrı İngrida Şimontye belän dä küreşte.

Singapur däwlät başlığı Xälimä Yakup 22-24 may könnärendä berençe tapqır Qazaqstan häm Üzbäkstanğa räsmi säfär yasadı. Xälimä Yakup Qazaqstan häm Üzbäkstanda räsmi tantana belän qarşı alındı. Singapur ilbaşı Qasıym-Cumart Toqayev häm Şäwkät Mirziyayev belän söyläşülär ütkärde. Söyläşülärdän soñ Qazaqstan häm Singapur arasında 4, Üzbäkstan häm Singapur arasında 7 kileşügä qul quyıldı.

Rusiyä prem’yer-ministrı Mixail Mişustin 22-24 may könnärendä Qıtay Xalıq Cömhüriyätenä säfär oyıştırdı. Mişustin säfäre qısalarında Qıtay ilbaşı Si Ŝzin’pin, prem’yer-ministr Li Ŝyan belän söyläşülär uzdırdı. İke il arasında 5 kileşü imzalandı. Yasalğan açıqlawlarğa kürä Qıtay häm Rusiyä arasındağı tüläwlärneñ 70%ı sum häm yuan’ belän yasaldı, ike yaqlı säwdä küläme bıyıl 40%ka üste.

24 may könne Mäskäwdä “Küp qotıplı dön’yada Awraziya bötenläşüe” isemle 2nçe Awraziya iqtisadi forumı oyıştırıldı. Forumda Rusiyä, Belarus, Ärmänstan, Qazaqstan häm Qırğızstan däwlät başlıqları häm prem’yer-ministrları qatnaştı.

25 mayda Mäskäwdä Awraziya İqtisadi Berlegeneñ Yuğarı Awraziya İqtisadi Şurası cıyılışı gibrid formatta uzdı. Cıyılışta Azärbaycan, Ärmänstan, Üzbäkstan, Kuba, Tacikstan, Rusiyä, Belarus, Ärmänstan, Qazaqstan häm Qırğızstan prezidentları belän prem’yer-ministrları qatnaştı. Cıyılış azağında 14 kileşü imzalandı.

Älege cıyılış qısalarında Azärbaycan, Ärmänstan häm Rusiyä liderları oçraştı. Cıyılış axırında Azärbaycan häm Ärmänstannıñ cir bötenleklären ike yaqlı bularaq tanuları, Zengezur koridorınıñ açıluı mäs’äläsendä kileşü täêmin itüläre açıqlandı. Vladimir Putin 3 il prem’yer-ministr urınbasarlarınıñ 1 atna êçendä çişelmägän mäs’älälärne söyläşü öçen oçraşaçaqların belderde. Cıyılışqa 1 kön qala Ärmänstan prem’yerı ilenen Kollektiv iminlek kileşüe oyışmasınnan çığu mäs’äläseneñ kön tärtibendäge urının saqlawın citkergän ide.

25 may könne Minsk şähärendä Rusiyä häm Belarus saqlanu ministrları Sergey Şoygu häm Viktor Xrenin Belaruska atom-töş qorallarnıñ urnaştırıluına qarağan dokumentlarğa qul quydı.

Rusiyä häm Gruziya arasında hawa transportı tıyuınıñ beterelüe säyäsätçelär arasında bäxäs tudırdı. Gruziya oppoziŝiyase qararnı protest itep, miting oyıştırdı. Gruziya ilbaşı Salome Zurabişvili bu qararnı xuplamawın açıqladı. Monnan soñ Gruziya hawa yulları başlığı Tamaz Gayaşvili prezident Zurabişviline persona non grata itep iğlan itülären, oçqıçlarına kertmäyäçäklären belderde. Qayber belgeçlär Awrupağa tranzit reyslar mäs’äläsendä Tbilisi aêroportınıñ Xalıqara İstanbul hawa mäydanına köndäş bulacağın äytä.