Qazaqstan İlbaşınıñ Qırğızstan säfäre

Qazaqstan İlbaşı Qasıym Cumart Toqayıv 2022nçe yılnıñ 26nçı may könne Qırğızstanğa ber könlek räsmi säfär yasadı. Qırğız Däwlät başlığı Sadır Caparov Toqayıvne Bişkäktäge Ala Arça däwlät sarayında räsmi tantana belän qarşı aldı. Qarşı alu tantanasınnan soñ ike lider üzara häm wäkilleklärara söyläşülär ütkärde. Söyläşülär waqıtında ike yaqlı mönäsäbätlär häm regional’ mäs’älälär quzğatıldı. Cıyılış axırında İlbaşlarınıñ urtaq beldergese häm ike il arasındağı 13 kileşü imzalandı.

Jurnalistlar öçen oyıştırılğan matbuğat oçraşuında İlbaşı Sadır Caparov Qırğızstan-Qazaqstan çigendä urtaq säwdä-logistik töbäkne tözi başlawların, yök maşinalarınıñ ozaq yıllardan birle çişelä alınmağan qırğız-qazaq çigennän uzu problemasın xäl itäçäklären belderde. İlbaşı Toqayıv isä qazaqlarğa iñ yaqın qardäş xalıqnıñ qırğızlar buluın iskärtep uzdı. Däwlät başlıqları urtaq säwdä külämen 2 milliard dollarğa citkerüne maqsat itülären belderde.

Awraziya iq’tisad berlegeneñ çirattağı räise wazıyfasın başqaruçı Qırğızstan şul uq könne Awraziya iq’tisad berlegeneñ 1nçe Awraziya iq’tisad forumın gibrit formatta uzdırdı. Rusiyä, Ärmänstan häm Belarus liderları bu forumda onlayn bularaq qatnaştı. Cıyılışta berlekneñ mäs’äläläre quzğatıldı häm şuşı mäs’älälärgä qağılışlı sorawlarğa cawap birelde. Şuşı forumda 15 ildän 2 meñ yarım keşe qatnaştı.

Awraziya iq’tisad forumınnan soñ İlbaşları Caparov häm Toqayıv Al Farabi qazaq milli universitetınıñ yaña açılğan Bişkäk filialında buldı. Annan soñ Däwlät başlıqları qazaq şağıyre Abay Kunanbayıvneñ häykälen açtılar. İlbaşı Caparov Kunanbayıvneñ häykälen açu tantanasında Çınğız Aytmatovnıñ häm “Manas” häykälläreneñ yaqın waqıtta Qazaqstanda salınaçağın citkerde.

Şul uq könne Qazaqstan Senatı Qırğızstanğa xärbi-texnik yärdäm kürsätelüe ölkäsendä ike yaqlı kileşüne rasladı. Qazaqstan monnan alda da Qırğız Cömhüriyäte armiyasına xärbi-texnik yärdäm kürsätkän ide.

İlbaşı Qasıym Cumart Toqayıvnıñ Qazaqstanda barlıqqa kilgän ğıynwar waqıyğalarınnan soñ tağın da aktiv tışqı häm êçke säyäsät alıp bara başlawı küzätelä. Mäsälän, İlbaşı Toqayıv Bişkäk säfäre aldınnan Törkiyägä, Berläşkän Ğaräp Ämirleklärenä häm Rusiyägä säyäxät yasağan ide. Kürşelär belän yaqın xezmättäşlek alıp baru Qazaqstannıñ tışqı säyäsät östenleklärennän berse.

Qırğızstan İlbaşı Sadır Caparov Bişkäktäge söyläşüdä Qırğızstan häm Qazaqstan arasında 2003nçe yılda imzalanğan xezmättäşlek kileşüen küzdän kiçerergä, ike yaqlı mönäsäbätlärne yaña däräcägä kütärergä täq’dim itte. Qırğızstan häm Qazaqstan Törkiyä häm Azärbaycan ürnägendä bulğanı kebek möbäsäbätlärne yaña däräcägä citkerep, ike däwlät, ber millät säyäsäten alıp bara ala. Rusiyä-Könbatış suğışı, Äfğanstandağı wazğıyät häm regional’ iminlek mäs’äläläre mondıy yaqın xezmättäşlekne mäcbüri qıla.

Qısqası, Qazaqstan İlbaşı Qasıym Cumart Toqayıvnıñ Qırğızstan säfäre näticäle uzdı. Ayıruça tamğaxanä, transport, iminlek ölkälärendä möhim kileşülärgä qul quyıldı. Qırğız-qazaq xezmättäşlegeneñ nığıtıluı Törkistannıñ tağın da köçle buluına öleş kertäçäk.