تورکیه کې د زلزلې نه وروسته د چپه شوو ودانیو لاندې نه د هر تن ژوندي ژغورل هیلې او امیدونه تازه کوي

په تورکیه  د فبرورۍ په شپږمه په لسو ولایتونو کې د رامنځته شوې زلزلې نه وروسته په زرګونو تنه د ژغورنې او لټون دلې او رضاکاره پرسونل  د چپه شوو ودانیو له خاورو لاندې د ښه خبر او بندو پاتو انسانانو د ژغورولو په خاطر پرته د ځنډه کار کوي.

سره ددې چې ددې زلزلې نن څلورمه ورځ ده خو اوس هم د نړېدولو ودانیو د خاورو او ګټو لاندې نه د هیلو او امیدونو ژوندي کوونکي خبرونه او زیري ورکول کیږي.

په غازي انتپ ولایت کې د زلزلې د رامنځته کیدو نه ۷۶ ساعته وروسته  د ژغورنې ډلې د ایرسین او مصطفی او د هغوې پلار درې تنه د چپه شوو ودانیو د خاورو د لاندې نه ژوندي وژغورل.

همداشان  قهرامان ماراش ولایت کې د زلزلې د رامنځته کیدو نه ۷۲ ساعته وروسته ۷۲ کلن اسماعیل التنولوک ، ۷۳ ساعته وروسته د یو تن درې کلن ماشوم په ګډون درې کسیزه کورنۍ ، ۷۰ ساعته وروسته یو ۴۹ کلن دوران شکر او ۶۸ ساعته وروسته یوه ۸۰ کلنه میرمن ژوندۍ وژغورل شوه.  همداشان د دیاربکر ولایت په بغلر ولسوالۍ کې هم یوه ښځه ۷۲ ساعته ورسته د چپه شوي  ودانۍ  لاندې نه ژوندۍ وژغورل شوه.

همداشان په هتای ولایت کې د زلزلې د رامنځته کیدو نه ۶۷ ساعته وروسته دوه تنه بهرني اتباع چې یو ماشوم ول د چپه شوې ودانۍ لاندې نه ژوندي وژغورل شول.

همداشان له زلزلې ۶۸ ساعته وروسته د ۳ ماشومانو په ګډون ۶ تنه د خاورو لاندې نه  ژوندي را وایستل شول. . له زلزلې ۶۶ ساعته وروسته یو ۷ میاشتنی ماشوم هم له چپه شوې ودانۍ لاندې نه ژوندي وژغورل شو.

همداشان په ادیمان ولایت کې هم د زلزلې نه  ۶۵ ساعته وروسته یوه مور د دوو لوڼو سره د چپه شوې ودانۍ لاندې نه ژوندي راوایستل شول. په شانلي اورفا ولایت کې بیا ۶۹ ساعته وروسته یوه میرمن ژوندۍ د خاورو لاندې نه راوایستل شوه.

دا ژغورنې او زیري په سیمه کې د هغه انسانانو چې د خپلو کورنیو د غړیو او خپلوانو په لټه کې دي امیدونه او هیلې زیاتوي.