په تورکیه کې د زلزلې له امله د مړو شمیر ۷۱۰۸ تنو ته او د ټپیانو شمیره د ۴۰۹۱۰ تنو لوړه شوه.

په تورکیه کې د زلزلې له امله د مړو شمیر ۷۱۰۸ تنو ته او د ټپیانو شمیره د ۴۰۹۱۰ تنو لوړه شوه.

د تورکیې  د ناورین او د  بیړنیو حالاتو ادارې  د ځاني‌ تلفاتو د وروستیو ارقامو په اړه معلومات ورکړل. د ناورین او بیړنیو حالاتو ادارې ویلي‌ چې  د هیواد په لسو ولایتونو کې د ريښتر په کچه د ۷ عشاریه ۷ په لویوالي‌ سره د رامنځته شوو دوو جلا جلا زلزلو نه وروسته  د پلټنې او ژغورنې‌ چارې دوام لري.

زلزله ځپو سیمو ته د مځکې او هوا له لارې مرستندویه ډلې رسیدلي‌ او را روانې دي.

د ژغورنې او پلټنې عملیات  د خپل ټول شدت سره دوام لري.

په سیمه کې د زلزله ځپلو کورنیو د سرپناه لپاره ۵۰۸۱۸ کورنۍ خیمې جوړې شوې.

۷۹ زره ۱۱۰ د لټون او ژغورنې پرسونل په ساحه کې کار کوي.

ټول ۵۴۰۲ وسایط، په عمده توګه بیلدوزرونه، ګریډرونه، کرینونه، لارۍ او ډول ډول ساختماني تجهیزاتو باندې سمبال وسایط په زلزله ځپلو سیمو کې  کار کوي.

د هیواد د سمندري ځواکونو لخوا  سیمې ته د پرسونل، موادو او زلزله ځپلو د تخلیې په موخه لس کښتۍ استول شوي دي. همداشان د ولسمشر رجب طیب اردوغان لخوا د ولسمشرۍ ماڼۍ اړوند دوه ځانګړې الوتکې هم سیمې ته د موادو او زلزله ځپلو سیمو نه د خلکو د تخلیې په خاطر په دنده ګمارل شوي دي.

د هوا د شرایطو د ښه کیدو نه وروسته چورلکو هم سیمې ته د پرسونل  او اړینو موادو د انتقال او سیمې نه د خلکو د تخلیې په خاطر الوتنې پيل کړي دي.

د هیواد ولسمشر رجب طیب اردوغان  پرون  وویل چې "اوس مهال زمونږ ۱۶۱۳۹ تنه  د لټون او ژغورنې پرسونل د کنډوالو په سیمه کې کار کوي. د هر ساعت په تیریدو سره دا شمیر د تورکیې او بهر څخه د نوو ټیمونو د راتلو سره لوړیږي." همداشان د بهر نه د راغلو ژغورنې ډلو او روغتیايي ډلو په ګډون ټولټال په سیمه کې د ۶۰ زرو نه ډیر پرسونل د ژغورنې په عملیاتو کې په دنده بوخت دي.

"زمونږ ژاندارم ځواکونه  د زرګونو تنو پرسونل  او ۲۶ کارګو الوتکو او زمونږ د ساحل د امنیت ګارډ  قوماندې د خپلو  لویو او ګړندیو  کښتیو سره د پیښې په سیمو کې په دنده ګمارل شوي او دنده اجراء کوي. نږدې ۱۰۰۰ امبولانسونه ، ۲۴۱ ملي روغتیايي د ژغورنې  ټیمونه او ۲ امبولانس چورلکې او ۵ زره روغتیايي پرسونل سره  سیمې ته لیږدول شوي دي.

ولسمشر اردوغان وویل چې ، مونږ  ته تر اوسه له ۷۰ بېلابېلو هېوادونو او ۱۴ نړیوالو سازمانونو څخه د مرستو وړاندیزونه شوي دي.