د قطر د کړکیچ د حل په خاطر د ولسمشر اردوغان هلې ځلې!
ولسمشر اردوغان د قطر د کړکیچ د حل په خاطر د نړۍ د مشرانو سره خبرو ته دوام ورکوي
د ترکیې ولسمشر رجب طیب اردوغان د خلیج هیوادونو او قطر ترمنځه د روان کړکیچ د حل په خاطر هلې ځلې کوي.
د ولسمشرۍ ماڼۍ د معلوماتو له مخې ولسمشر اردوغان پدې چوکاټ کې د نړۍ د یو زیات شمیر هیوادونو د مشرانو سره د ټیلیفون په کرښه خبرې کړي دي.
ولسمشر اردوغان پرون د فرانسې ولسمشر امانویل مکرون ، اندونیزیا ولسمشر جوکو ویدودو، د بحرین پاچا حمد بن عیسی الخلیفه، اردن پاچا دویم عبدالله، لبنان لومړي وزیر سعد حریري او د مالیزیا لومړي وزیر نجیب تون عبدالرازق سره د ټیلیفون په کرښه خبرې وکړې.
ولسمشر اردوغان پدې ټیلیفوني خبرو کې ددې خبرې په ټینګار وویل چې د سیمې روانې ستونزې باید د ډیالوګ او ډیپلوماسۍ له لارې حل شي.ولسمشر اردوغان ویلي دي چې ترکیه پدې برخه کې هر ډول مرستې ته تیاره ده.
د ویلو ده چې ولسمشر اردوغان وړمه ورځ پدې اړه د قطر د امیر شیخ تمیم بن حمد الثاني، روسیې ولسمشر ولادیمیر پوتین، کویټ پاچا شیخ صباح الاحمد الصبا او سعودي عربستان د پاچا ملک سلمان بن عبدالعزیز ال سعود سره د ټيلیفون په کرښه خبرې کړې وې.
د یادولو وړ ده چې د تیرې دوشنبې په ورځ د خلیج څلورو هیوادونو سعودي عربستان، بحرین، مصر او متحده عربي اماراتو د قطر سره خپلې ټولې اړیکې وشلولې. همداشان وروسته نورو هیوادونو هم د سعودي په مشرۍ پدې ایتلاف کې ګډون وکړ او د قطر سره يي د اړیکو د شلولو اعلان وکړ.
دا هیوادونه قطر په سیمه کې د ترهګرو او ایران پلوه ډلو نه په ملاتړ تورنوي.
اړوند خبرونه
ولسمشر اردوغان د لبنان د لومړی وزیر میقاتي سره ټیلیفوني خبرې وکړې
د تورکیې ولسمشر رجب طیب اردوغان د لبنان له لومړي وزیر نجیب میقاتي سره ټیلیفوني خبرې وکړې.
