اردوغان : د ترهګریزو سازمانونو پر خلاف روانه مبارزه به ددوی د ریښو د وچولو پورې دوام وکړي

د ترکیې ولسمشر رجب طیب اردوغان وویل چې  د پې کاکا  او داعش ترهګرو سازمانونو  پر خلاف به روان عملیات  د نوموړو د ریښو د وچولو پورې  په همدې شان دوام وکړي.

ولسمشر اردوغان  دا څرګندونې د غازي انتب په ولایت کې  د ملي یووالي او ورورولۍ  په غونډه کې وکړې. د ویلو ده چې  د اګست په شلمه نیټه  داعش ترهګرې ډلې  په غازي انتب ولایت کې د واده په مراسمو ځانمرګی برید وکړ چې له امله ۵۴ تنه مړه  او څه باندې ۶۰ تنه نور ټپیان شول.

ولسمشر اردوغان  پرون  لومړی  د نوموړی  پیښې د قربانیانو د کورنیو ، د واده والا  او د ټپیانو نه لیدنه وکړه او وروسته د یووالي او ورورولۍ  په غونډه کې ګډون وکړ.

ولسمشر اردوغان  پدې غونډه کې ددې خبرې په ټینګار وویل چې « ترکیه هیڅوخت ترهګرو سازمانونو ته  تسلیم شوې نده  او ددېنه وروسته به هم  تسلیم نشي. ولسمشر زیاته کړه چې  د اګست په شلمه  د واده په مراسمو  د برید اصلي هدف  په هیواد کې ټولنیز بحران  رامنځته کول وو. »

هغه وویل چې  داعش ترهګرې ډلې  په قصدي ډول سره  دا برید  د کورد میشته  سیمې وکړ . هغوې غوښتل چې ددې ډول برید سره  په ټولنه کې  بحران رامنځته کړي  او د ټولنې د خلکو ترمنځه ستونزې رامنځته کړي  خو  د شکر  ځای  دی چې  دې چټلې موخې ته ونه رسیدل.

ولسمشر اردوغان په سوریه کې  د جرابلس  عملیاتو ته په اشارې سره وویل « د جرابلس  د سیمې اصلي خاوندان  او میشت خلک  سیمې ته  راګرځي . په غازي انتب کې  میشت  د جرابلس  خلکو ته  وایو، هر هغه څوک  چې وغواړي  خپل کور او کلي ته ستون شي  هر ډول مرسته به ورسره وشي.»

ولسمشر اردوغان  په وینا کې  د جولای په ۱۵ مه د فتح الله ګولن ترهګریز سازمان  د ناکامې کودتا نه هم یادونه وکړه.

په غونډه کې ګډون کوونکو په زرګونو تنو  « د خاینینو لپاره اعدام غواړو » په څیر  د شعارونو په ځواب کې وویل چې  « د اعدام په اړه پریکړه  د ولسي جرګې کار دی. دا پریکړه به ولسي جرګه کوي. ستاسې دا غوښتنه  ما  په خپله  ولسي جرګې ته  وړاندې کړې ده . که چیرې  ولسي جرګه  د اعدام اړوند قانون تصویب کړي  ، زه به يي سمدلاسه توشیح کړم. »

ولسمشر اردوغان  د فتح الله ګولن ترهګریز سازمان پر خلاف روانې مبارزې ته په اشارې سره وویل « د هیواد سربیره په نړۍ کې به د فتح الله ګولن ترهګریز سازمان ریښې  وچې کړو. د نړۍ د هیوادونو سره  مو  د فتح الله ګولن ترهګریز سازمان پر وړاندې د مبارزې په خاطر تماس  نیولی دی. نړۍ ولسمشرانو سره  په تماس کې  هغوې ته په سراحت سره  ویلي دي چې  انتخاب د هغوې په لاس کې دی، د ترکیې پلوي کوي  او که  د فتح الله ګولن .

ولسمشر اردوغان وویل چې  د ترهګریزو سازمانونو  نومونه  جلا جلا دي  خو هدف  يي یو  دی. ټول  د یو ځای  لخوا  سوق او اداره کیږي.