د تركيې په جګړه كې ۹ كلنه افغانۍ قرباني

د تركيې په ختيځ كې د حكاري ولايت په مربوطاتو كې د مسافرينو د سپرلۍ په بس باندې د مرمۍ د لګېدلو په پايله كې يوه ۹ كلنه افغانه ماشومه ووژل شوه. دا پېښه نن سهار د حكاري – يوكسك اوا پر لويه لار رامنځته شوه. د پېښې نه سمدستي وروسته ټپې شوې افغانه روغتون ته انتقال شوه خو څو ساعته وروسته يې بيا په روغتون كې سا وركړه. دا لا معلومه نه ده چې مرمۍ له كومه راغلې او يا د چا لخوا توغول شوې ده.
د پوليسو د معلوماتو له مخې په بس كې هغه ناقانونه افغان كډوال سپاره ول چې د ايران له لارې په غير قانوني توګه تركيې ته را اوښتي ول. پوليس وايي چې د پېښې په اړه اړوندې څېړنې پيل شوي دي.
په افغانستان كې د جګړې، بېوزلۍ او بېكارۍ له امله هر ورځ سلګونه افغانان د قاچاقي لارو تركيې او بيا وروسته اروپا ته ځي.
د تركيې په ختيځ كې د پې كا كا د ترهګرې ډلې پر وړاندې د امنيتي ځواكونو مبارزه روانه ده.