په جلال آباد کې چاودنه وشوه

د افغانستان  په ختیځ کې د ننګرهار ولایت په مرکز جلال آباد ښار کې  ملي اردو ته  د جلب شوو سرتیرو  د لیږد پر موټر  چاودنه وشوه.

د ننګرهار ولایت د والي ویاند عطاالله خوږیاڼي ویلي دي چې دا پیښه  نن په ځايي وخت د مازیګر د څلورنیمو بجو په شاوخوا کې  د جلال آباد  ښار د دریمې حوزې  په سیمه کې رامنځته شوې ده .

ویاند ویلي دي چې چاودنه د ملي اردو د جلب او جذب په یو کاسټر ډوله موټر  چې ملي اردو ته  جلب شوي تازه سرتیري پکې سپاره ول شوې ده .

پدې پیښه کې  لږ تر لږه  لسو تنو ژوند د لاسه ورکړی  او ۴۳ تنه نور ټپيان شوي دي.

د پيښې قربانیان  ډیری  ملکي وګړي دي. ویل کیږي  چاودنه  پداسې ځای کې شوې ده چې شاوخوا ته يي  په یو لوبغالي کې لوبه روانه وه. 

خوږیاڼي ویلي دي چې چاودنه  د یو زرنج ډوله موټر سایکل پر مټ شوې ده .