د طالبانو قومندان ملا روف : ملا اختر وژل شوی دی

د طالبانو  یو قومندان  په هوايي برید کې  د ملا اختر محمد منصور د مړینې د خبر پخلی وکړ.

د طالبانو یو تن مخکښ  قومندان ملا عبدالروف  د اسوشیتد پرس خبري اژانس سره په مرکه کې  د ملا منصور د مړینې د خبر پخلی کړی دی.

هغه ویلي دي چې د طالبانو مشر ملا اختر محمد منصور  د پاکستان په خاوره کې  د افغانستان پولې ته نږدې  د بې پیلوټه الوتکې په برید کې وژل شوی دی .

د بله پلوه  د افغانستان حکومت هم  د طالبانو په مشر د برید پخلی کړی دی خو د وژل کیدو د خبر پخلی يي ندی کړی. افغان حکومت ویلي دي چې  د څیړونو او ارزونو نه وروسته به ددې برید وروستۍ پایلې اعلان شي.

د ترلاسه شوو معلوماتو له مخې  د امریکا د دفاع وزارت د پاکستان په خاوره کې  د طالبانو د مشر ملا اختر محمد منصور د ځای د تثبیت نه وروسته  ولسمشر باراک اوباما ته په هغه د برید  په خاطر  د اجازې  وړاندیز وکړ چې ولسمشر اوباما ورته د برید اجازه ورکړه.

همداشان  ځینو امریکايي چارواکیو هم  چې د نوم د اخیستو نه يی ډډه کړې ده د ملا اختر منصور  د وژل کیدو پخلی کړی دی خو د امریکا د دفاع وزارت بیا ویلي دي چې کیدای شي چې  نوموړی وژل شوی وي خو په دقیقه توګه يی څه ندي ویلي.

پنټاګون ویلي دي چې  وروستۍ پایلې به د څیړونو نه وروسته اعلان شي.