په فاریاب کې د پولیسو یو تن مشر ووژل شو

د افغانستان په شمال کې د فاریاب ولایت د پولیسو یو تن مشر د خپلو ساتونکو سره په ګډه د طالبانو لخوا ووژل شو.

د افغانستان په شمال کې د فاریاب ولایت د امنیتي سرچینو د خبر له مخې د نوموړي ولایت د بل چراغ د ولسوالۍ د امنیې قومندان نجیب الله د یاد شوي ولایت د ګوزیوان په ولسوالۍ کې د طالبانو په یو برید کې ووژل شو.

ویل کیږي په نښته کې د بل چراغ د ولسوالۍ د امنیې قومندان سربیره د هغه پنځه تنه ساتونکي هم وژل شوي دي.

د ویلو ده چې د یادې شوې ولسوالۍ پخوانی د امنیې قومندان محمد ظفر هم د طالبانو په یوه چاودنه کې ژوند دلاسه ورکړی وو.

طالبانو د پسرلي د رارسیدو سره په ټول افغانستان کې او په ځانګړې توګه په شمالي ولایتونو کې بریدونو ته زور ورته کړی دی.

طالبانو د کندوز په ولایت کې هم پراخه بریدونه پیل کړي چې د افغان ځواکونو لخوا په شا تنبول شوي دي.

د افغانستان د ملي دفاع وزارت د معلوماتو له مخې پدې نښته کې د ۸۰ تنو طالب اورپکو د وژل کیدو او څه باندې ۵۰ تنو د ټپي کیدو نه خبر ورکړی دی.