د ترکیې د ورځپاڼو سرټکي

د وطن ورځپاڼې « اردوغان افتخاري مشر په توګه وټاکل شو »  د سرلیک لاندې لیکلي دي، د ترکیې ولسمشر رجب طیب اردوغان « بیت المقدس په ۲۰۱۸ کال کې د اسلامي نړۍ او ځوانانو پلازمینه  » د پروګرام  د بڼسټ ایښودونکي  هیت  د افتخاري مشر په توګه وټاکل شو.

د اسلامي همکاریو د تشکیلاتو اړوند  د اسلامي کنفرانس د ډیالوګ او  همکاریو د ځوانانو  د فورم  او فلسطین  د ځوانانو او سپورت  د وزارت په همکارۍ جوړ شوي 

« بیت المقدس په ۲۰۱۸ کې د اسلامي نړۍ او ځوانانو پلازمینه » پروګرام  په فلسطین کې جوړ شو. دا پروګرام  د فلسطین ولسمشر محمود عباس په پرانیست وینا  پیل شو.

د ینې شفق ورځپاڼې  « د ولسمشر ویاند : د زیتون څانګې عملیات د پلان  په مطابق  په ډير بریالیتوب سره  پر مخ روان  دي »  د سرلیک لاندې لیکلي دي، د ترکیې د ولسمشر رجب طیب اردوغان ویاند  ابراهیم قالن  خبري غونډې ته وویل چې  د سوریې د عفرین په سیمه کې د ترکیې د وسله والو ځواکونو  د زیتون څانګې په نامه  عسکري عملیات د پلانونو سره  سم  په ډیر بریالیتوب سره  پر مخ روان دي. هغه وویل چې  د نوموړو عملیاتو په ترڅ کې  تر زرو تنو ډیر ترهګر له منځه وړل شوي دي او یو زیات شمیر مهمې سیمې  نیول شوي دي.

د سټار ورځپاڼې  «  د عدن په خلیج کې د ترکي ځواکونو د دندې موده  یو کال لپاره نوره هم  وغځول شوه  » د سرلیک لاندې لیکلي دي، د عدن  په خلیج کې د ترکیې د سمندري ځواکونو د دندې موده  د یو کال لپاره وغځول شوه. د ترکیې د وزیرانو شورا  پدې اړه  ملي شورا ته وړاندیز وکړ چې ملي شورا  د تیرې ورځې په عمومي غونډه کې  د رایو په اکثریت سره  دا اجازه نامه  تصویب کړه.

د ترکیې سمندري ځواکونه د عدن په خلیج کې د سمندري ډاړه مارانو پر خلاف  د مبارزې په خاطر  دنده  ترسره کوي.

د خبرترک ورځپاڼې  « چاوش اوغلو ایران ته سفر وکړ »  د سرلیک لاندې لیکلي دي،د ترکیې د بهرنیو چارو وزیر مولود چاوش اوغلو د رسمي سفر په ترڅ کې  ایران ته سفر وکړ. مولود چاوش اوغلو  په ایران کې د خپلو لیدونو کتنو په ترڅ کې  د نوموړي هیواد د ولسمشر حسن روحاني سره هم  لیدنه وکړه.

په لیدنه کې د دوه اړخیزو اړیکو سربیره  د سیمې او نړۍ په مهمو پرمختګونو خبرې وکړې.

د حریت ورځپاڼې  « د اروپايي ټولنې د چارو د وزیر چیلیک لخوا د ویزې په اړه څرګندونې » د سرلیک لاندې لیکلي دي، د ترکیې د اورپايي ټولنې د چارو وزیر عمر چیلیک د ترکیې  په ملي شورا کې  د اروپا سره د تطابق د کمسیون د ریس او غړیو سره  لیدنه وکړه. وزیر چیلیک  د اروپايي ټولنې سره  د ویزې د معافیت په اړه د روانو مذاکراتو  په اړه  کمیسیون ته معلومات ورکړ.

هغه وویل چې ترکیې د اروپايي ټولنې سره د وزیرې د معافیت  په برخه کې خپل ټول مسئولیتونه  سرته رسولي دي. زمونږ  په اند  د ټولنې لخوا ټاکل شوي  ۷۲ شرطونه ټول پر ځای شوي دي. اوس وار  د ټولنې دی.