د ترکیې د ورځپاڼو سرټکي

د حرییت ورځپاڼې  امریکا متحده ایالتونو  ته   د ترکیې د عدلیې  وزیر په مشرۍ د هیت سفر په اړه خبر خپور کړی دی . یادې شوې ورځپاڼې  د ترکیې د مرستیال لومړي وزیر نعمان کورتولموش  له قوله لیکلي دي چې ، امریکا ته د عدلیې د وزیر په مشرۍ د هیت د سفر اصلي  موخه  د فتح الله ګولن ترهګریز سازمان د مشر ترکیې ته د سپارولو د مسلې په اړه ده. هغه وویل چې  د عدلیې وزیر به د  امریکايي چارواکیو سره په لیدنه کې ترکیې ته د فتح الله ترهګریز سازمان د مشر فتح الله ګولن د سپارولو  پورې  د هغه  د نیولو غوښتنه وکړی. هغه وویل  داسې ښکاري  چې  ترکیې ته د فتح الله ګولن د اعاده کولو بهیر  اوږد  شي. خو د فتح الله ګولن ترهګریز سازمان  مشر د نړۍ په څلورو ګوډونو کې  د خپلو پلویانو په راټولو پیل کړی دی . دې مسلې ترکیې ته  جدي ګواښ مخامخ کړی دی . مرستیال لومړي وزیر وویل چې  فتح الله ګولن  په امریکا کې د امکاناتو نه په استفادې سره  اوس هم  ترهګریزو فعالیتونو ته دوام  ورکوي چې هر څه ژر باید ددې خبرې مخنیوی وشي.

د صباح ورځپاڼې  « ترکیه  د نورو په امر حرکت  نه کوي  »  د سرلیک لاندې لیکلي دي د ترکیې مرستیال لومړي وزیر نورالدین جنکلي  وویل چې  ، د امریکا لخوا  د سپټمبر د ۱۱مې په پیښه کې  د سعودي عربستان د خپې د راکاږولو پریکړې  په پرمختللو هیوادونو کې  د خلیج هیوادونو د پانګه اچونو  منفي اغیزې کړي دي. د امریکا متحده ایالتونو دې پریکړې  خلیج هیوادونو  کې یو ډول  بې باوري پیدا کړې ده . هغه  د خلیج هیوادونو پانګه والو ته په ترکیه کې د پانګه اچونې  بلنه ورکړه.

د ترکیې مرستیال لومړي وزیر وویل چې  په نړۍ کې  د هغه هیوادونو  او د هغوې په امر د حرکت کوونکو بازارونو  په مقابل کې باید  یو ښه بدیل بازار  پیدا کړو. یو ډیر ښه مالي مرکز  پيدا کړو. د همدې امله  ترکیه د هغوې پر وړاندې  د بدیل په توګه تر ټولو  ښه او مناسب هیواد   او مالي  مرکز   دی. هغه زیاته کړه چې  په ترکیه کې هر کال  د سیمې د هیوادونو نه د ۱۵ نه تر ۲۰ میلیاردو ډالرو پورې  پانګه اچونې کیږي.

د تیرو ۱۴ کلونو راهیسې  په ترکیه کې پانګه وال تل ګټه کوي.   ترکیه یوه بله مهمه ځانګړتیا هم  لري هغه داده چې ، هر پانګه وال چې څه وخت وغواړي په هماغه وخت کولی شي چې د ترکیې نه خپله سرمایه وباسي.

د ینې شفق ورځپاڼې  « بهرني پانګه وال په ترکیې پوره باور لري » د سرلیک لاندې لیکلي دي د اقتصادي درجه بندیو د سازمان  مودیز  لخوا د ترکیې د اقتصادي لمبرو د راټیټولو  د پریکړې سره سره  بهرنیان په ترکیه کې پانګه اچونې ته دوام  ورکوي. بهرنیان په ځانګړې توګه  د غیرمنقول اموالو په برخه کې  پانګه اچونې کوي. د استانبول  د ساختماني شرکتونو ټولنې  ویلي دي چې  د اقتصادي درجه بندیو د نړۍوال سازمان  د ټولو ناکامو هلو ځلو او دښمنیو سره سره  په ترکیه کې  پانګه اچونې دوام لري. په ځانګړې توګه ساختماني سکتور د هرې ورځې په تیریدو  وده کوي. د غیرمنقول اموالو  سکتور  د ودې په حال کې دی. یادې شوې ټولنې ویلي دي چې  هغه بهرنیان چې د ترکیې داخلي بازارونه  او فرصتونه د نږدې تعقیبوي  په ترکیه پانګه اچونې ته  ډیر زیات اهمیت ورکوي.

د وطن ورځپاڼې  «  د نړۍ تر ټولو لوی  ځوړند  پل  »  د سرلیک لاندې لیکلي  دي د ترکیې د چناک کلا په ولایت کې  د سمندر د پاسه  د نړۍ تر ټولو  لوی  ځوړند  پل  جوړیږي. ورځپاڼې  لیکلي دي ددې پل سره  به د اسیا او اروپا  دوه لویې وچې  یو ځل بیا سره  ونخلول شي.

ورځپاڼې  لیکلي دي چې د نوموړي پل  د جوړولو  قرارداد داوطلبۍ ته  وړاندې کیږي. د نوموړي پل په خاطر نن  د اکتوبر ۲۶ مه نیټه  داوطلبي  کیږي. تمه کیږي چې  د پل بنسټ  د ۲۰۱۷ کال  د مارچ په ۱۸ مه نیټه  کیښودل شي.

نوموړی  پل  د ۵۱۶۹ مترو په اوږدوالي سره  جوړیږي. تمه کیږي چې دا پل د پنځو کلونو په دننه کې جوړ او ګټې اخیستو ته  وسپارل  شي. په پل باندې  د ۱۰ میلیاردو ترکي لیرو د لګښت  اټکل شوی دی.

د خبرترک ورځپاڼې « حضرت محمد ص د الله رسول »  په نامه  فلم  نندارې ته وړاندې کیږي. ورځپاڼې  لیکلي دي نوموړی  فلم  لومړی  خبریالانو ته  نندارې ته وړاندې شو. پدې فلم کې  د اسلام د ستر پیغمبر حضرت محمد ص  د ماشومتوب  او ځوانۍ  ژوند ته  کتنه شوې ده .

فلم  د ایراني فلم جوړونکي  مجید مجیدي  لخوا جوړ شوی دی .