Джейк Салливан Киевке барды

АҚШ Ұлттық Қауіпсіздік ақылшысы Джейк Салливан Украина астанасы Киевке тосын сапармен барды.

Ұлттық қауіпсіздік кеңесінің баспасөз мәлімдемешісі Адриен Уотсон Джейк Салливанның сапары барысында жоғары лауазымды тұлғалармен, соның ішінде президент Владимир Зеленскиймен кездескенін білдірді.

Уотсонның айтуынша, Салливан «Өкілдер палатасының Украинаның маңызды соғыс қажеттіліктерін қанағаттандыру үшін ұлттық қауіпсіздікке қосымша заң жобасын шұғыл қабылдауы керек екенін» атап өтті.

Уотсон Салливанның украиналық әріптестерімен одақтастары мен серіктестерімен Ресейді өз әрекеттері үшін жауапкершілікке тарту және 2022 жылдың ақпан айынан бері жалғасып келе жатқан соғыстың Украина мен әлемге экономикалық зардаптарын азайту мақсатында жүргізіліп жатқан күш-жігерді талқылағанын баяндады. Уотсон сонымен қатар тараптардың Украинаның еуроатлантикалық интеграциясын ілгерілету мақсатында жемқорлықпен күрес және басқа да негізгі реформалар мәселесін де талқылағанын айтты.

АҚШ Сенаты 13 ақпанда қабылдаған Украина, Израиль және Тайваньға 95,3 миллиард долларлық әскери көмек пакеті Өкілдер палатасының  мақұлдауын күтсе, президент Джо Байден болса оны жеделдетуге шақырады.