Газада көмек көліктерін күтіп тұрған көптеген палестиналық қаза тапты

Израиль армиясының Газа секторында көмек көліктерін күтіп тұрған палестиналықтарды нысанаға алған шабуылында 7 адам қаза тауып, 20-дан астам адам жараланды.

Газа секторындағы Азаматтық қорғаныс бөлімшесінің баспасөз хатшысы Махмуд Басал Израиль армиясының Газаның шығысындағы Кувейт қиылысы маңында көмек көліктерін күтіп тұрған палестиналықтарды нысанаға алғанын айтты.

Басал шабуылда көмек күткендер арасында қаза тапқандар мен жараланғандар бар екенін білдірді.

«WAFA» Палестинаның ресми ақпарат агенттігі болса, шабуылда 7 адамның қаза тауып, 20-дан астам адамның жараланғанын хабарлады.

Израиль әскери ұшақтарының оңтүстіктегі Рафах қаласының Эс-Сауди ауданындағы бір үйді бомбалауы салдарынан бірнеше адамның жараланғаны жарияланды.

Сондай-ақ Израильдің Хан Юнус қаласының Абасан ел-Кебира және Хузаа аймақтарына артиллериялық оқ жаудырғаны, көптеген адамның қаза тапқаны және жараланғаны атап өтілді.

Израильдің 7 қазаннан бері Газа секторына жасаған шабуылдарында 31 мың 112 палестиналық көз жұмды. Оның ішінде кемінде 13 мың 500 бала мен 9 мың әйел қаза тауып, 72 мың 760 адам жараланды.