“Dörd ​​mühüm raket sistemi üçün tədarük müqavilələri imzalandı”, Y.Güler

  Türkiyənin milli müdafiə naziri Yaşar Güler ​​bildirib ki, ölkənin silahlı qüvvələrinin üstün texnika və sistemlərlə təchiz edilməsi yeganə məqsəddir.

  Paytaxt Ankarada keçirilən Quru Raket Sistemləri İmza Mərasimində çıxış edən Y.Gülər deyib: “İllər əvvəl xəyal olan bir çox müdafiə sənayesi məhsulu indi Türkiyənin öz qaynaqları ilə dizayn və istehsal edilir.

  Müdafiə sənayesi ekosistemimiz güclü infrastrukturu və qabaqcıl texnologiyası ilə beynəlxalq sektora liderlik edən bir mövqeyə gəlib. Bütün maneələrə, gizli və açıq embarqolara baxmayaraq, ölkəmiz hörmətli prezidentimizin irəli sürdüyü yüksək iradə və strateji baxışla bütün çətinliklərə sinə gərib və möhtəşəm bir hekayə yazıb.

  Dünyada, xüsusən də yaxın coğrafiyada çoxsaylı böhran və qarşıdurmaların artdığının, hətta müharibəyə çevrildiyinin şahidləriyik. Belə həssas bir dövrdə Türkiyənin hüquq və qanunlarını qorumaq üçün güclü silahlı qüvvələrinin olması həyati əhəmiyyət daşıyır.

  Dörd mühüm raket sistemi üçün tədarük müqavilələri imzalandı. Müqavilələr çərçivəsində “Tayfun” ballistik, “Sunqur” qısa mənzilli hava hücumundan müdafiə, “Karaok” çiyindən atılan tank əleyhinə və TRG-230 lazerlə idarə olunan artilleriya raketlərinin kütləvi istehsalı həyata keçiriləcək. Bu məhsullar istər daxildə, istərsə də sərhəddən kənarda intensiv və hərtərəfli fəaliyyət, xüsusən də terrorla mübarizə aparan quru qoşunlarımıza çox dəyərli töhfələr verəcək.

  Türkiyə Cümhuriyyətinin iki yüzüncü illərinə keçərkən və “Türkiyə əsri” hədəflərimizlə silahlı qüvvələrimizi üstün texnika və sistemlərlə təchiz etmək və müdafiə sənayemizi gücləndirmək, dünya miqyasında təsirini və bazar payını artırmaq yeganə məqsədimizdir”.