Türkiye Ermənistanı qınadı

Türkiye Ermənistanda Osmanlı siyasi və hərbi rəhbərlərinə və o zamanki Azərbaycan rəsmilərinə qarşı sui-qəsdləri törədənlərə həsr olunmuş abidənin ucaldılmasını qətiyyətlə pisləyib.

Türkiye Xarici İşlər Nazirliyindən verilən bəyanatda deyilir: “Biz İrəvanda 1920-ci illərin əvvəllərində Osmanlı siyasi və hərbi rəhbərlərinə, o zamankı Azərbaycan rəsmilərinə və hətta erməni əsilli bəzi Osmanlı vətəndaşlarına qarşı sui-qəsdləri törədənlərə həsr olunmuş “Nemesis abidəsi”nin açılmasını qətiyyətlə pisləyirik. Bu biabırçı abidənin açılışı 31 diplomatımız və onların ailə üzvlərinin ölümü ilə nəticələnən dəhşətli hücumlara səbəb olan qanlı terror aktını tərənnüm edir. Erməni mətbuatında bu hadisənin necə təqdim olunması da onu göstərir ki, tarixin təhrif olunmuş və təsdiqi mümkün olmayan təfsiri bəzi düşüncələrdə hələ də davam edir.Türkiyə ilə Ermənistan arasında normallaşma prosesinin ruhu ilə üst-üstə düşməyən bu cür təxribatçı addımlar bölgədə möhkəm, davamlı sülh və sabitliyin bərqərar olması səylərinə töhfə verməyəcək, əksinə, normallaşma prosesinə mənfi təsir göstərəcək''.