“Biz istənilən yerə gələ bilərik”, R.T.Ərdoğan

  Türkiyə prezidenti Rəcəb Tayyib Ərdoğan: “Bir daha bütün dünyaya bəyan edirəm ki, 30 kilometr dərinlikdə dəhlizlə cənub sərhədlərimizi qoruyana qədər bizim terrorizmə qarşı mübarizəmiz bitməyəcək”, - dedi.

  Türkiyənin Bitlis rayonunun Ahlat qəsəbəsində Malazgirt zəfərinin 951-ci ildönümü münasibətilə keçirilən tədbirdə iştirak edən Ərdoğan buradakı çıxışında deyib: “Anadolunun qapılarını türklərin üzünə açan Malazgirt zəfərinin 951-ci ildönümündə fəthi həyata keçirən Böyük Səlcuqlu Dövlətinin hökmdarı Alparslanı yad edirik. Gənclərimizin Ahlat və Malazgirti anladıqlarını görüncə böyük və güclü Türkiyənin gələcəyinə inamımız və 2053-cü il baxışına olan ümidimiz artır.

  Ahlat və Malazgirt qürurumuzu yenidən yüksəltmək iradəmizin adı, dostlarımıza güvən, düşmənlərimizə qorxu verən yüksəlişimizin möhürüdür.

  Bir daha dünyaya bəyan edirəm ki, 30 kilometr dərinlikdə dəhlizlə cənub sərhədlərimizi qoruyana qədər terrorizmə qarşı mübarizəmiz bitməyəcək. Ölkəmizin təhlükəsizlik prioritetlərinə və öz planımıza uyğun olaraq əməliyyatları davam etdiririk. Bir gecə qəfildən (Suriyanın şimalına) gələ bilərik. İstənilən yerə gələ bilərik. Biz terror təşkilatlarının başçılarını əzdik, əzməyə də davam edəcəyik”.