Mövlud Çavuşoğlu Suriya müxalifətinin liderləri ilə görüşüb

Xarici işlər naziri Mövlud Çavuşoğlu Suriya Müxalif və İnqilabçı Qüvvələr Milli Koalisiyasının sədri Səlim əl-Muslat, Müzakirə Komissiyasının sədri Bədir Camus və Suriya Müvəqqəti Hökumətinin sədri Əbdürrəhman Mustafa ilə görüşüb.

Nazir M.Çavuşoğlu "Twitter" hesabında Suriya müxalifət liderləri Muslat, Camus və Mustafa ilə görüş keçirdiyini paylaşaraq deyib:

“Biz müxalifətin BMT Təhlükəsizlik Şurasının 2254 saylı qətnaməsi çərçivəsində siyasi proseslərə verdiyi töhfəni yüksək qiymətləndirir və dəstəkləyirik”.

Qeyd edək ki, 2015-ci ilin dekabrında BMT Təhlükəsizlik Şurası tərəfindən yekdilliklə təsdiq edilən 2254 saylı qətnamə Suriyada fövqəladə atəşkəsin təmin edilməsi və bununla paralel olaraq siyasi danışıqların başlanmasına; iki il ərzində “birlik hökuməti”nin yaradılmasına, ardınca isə seçkilərin keçirilməsinə çağırır.