Türkiyədə 2 martdan başlayan mərhələli normallaşma prosesinin ayrıntıları

 Martın 1-də Türkiyə Nazirlər Kabineti ölkə başçısı Rəcəb Tayyib Ərdoğanın sədrliyi ilə toplandı.

  Prezident Aparatında (Cumhurbaşkanlığı) keçirilən yığıncaqda “Covid-19”la mübarizə çərçivəsində mərhələli normallaşmanın ayrıntıları - üz-üzə təhsil, restoran və kafelərin vəziyyəti, küçəyəçıxma məhdudlaşdırması, peyvənd müddəti ilə bağlı yeni qərarlar açıqlandı.

  Türkiyə prezidenti Rəcəb Tayyib Ərdoğan 2 martdan başlayaraq idarəli normallaşmaya keçiləcəyini bəyan etdi. Epidemiya tədbirlərinin tətbiqindən təxminən bir il keçdiyini xatırladan Ərdoğan dedi: “Bütün şəhərlər 4 risk qrupuna ayrılıb. Bu kateqoriyalar hər həftə nəzərdən keçiriləcək. Tədbirlərdə xəstəliyin gedişatına görə, 2 həftədə bir yerli qaydalar müəyyən ediləcək”.

  Beləliklə,

• Həftə sonu küçəyəçıxma məhdudlaşdırması aşağı və orta riskli rayonlarda tamamilə qaldırıldı.
• Yüksək və çox yüksək riskli rayonlarda bazar günü məhdudiyyəti qaldı.
• Ölkənin hər yerində olan 21.00-05.00 küçəyəçıxma qadağası davam edəcək.
• Bütün uşaq bağçaları, ibtidai və orta məktəblər, liseylər açılacaq.
• Aşağı və orta riskli rayonlarda məktəblər mərhələli şəkildə açılacaq.
• Yüksək və çox yüksək riskli rayonlarda yalnız liseylərdə imtahanlar üzbəüz keçiriləcək.
• Restoran, lokanta və kafelər, şirniyyat və çay bağçaları çox yüksək riskli rayonlardan başqa, hər yerdə saat 07.00 – 21.00 arası olmaqla məkanın adam həcminin 50 faizi qədər olmaqla çalışacaq.
• İdman meydançaları, hovuz və bənzər yerlər aşağı və orta riskli rayonlarda 09.00 – 19.00 arası fəaliyyət göstərəcək.
• Dövlət qurumları və ictimai idarələrdə iş normala dönəcək.
• Küçəyəçıxma qadağası 65 yaş üstü və 20 yaş altı qrup vətəndaşlarında aşağı və orta riskli rayonlarda qaldırıldı.
• Nigah mərasimləri və toylar aşağı və orta riskli rayonlarda 100, yüksək riskli rayonlarda 50 nəfərlik olmaqla keçiriləcək.
• İctimai-mədəni tədbirlər 300 nəfəri keçməyəcək şəkildə təşkil oluna biləcək.