Azərbaycan-Türkiyə hərbi əməkdaşlığı bütün Türk Respublikaları üçün modeldir
Dr. Telman Nüsrətoğlunun "Azərbaycan-Türkiyə hərbi əməkdaşlığı bütün Türk Respublikaları üçün modeldir" başlıqlı yazısını təqdim edirik.
Sosial strukturu, təşkilat sistemi və hərbi zəkası etibariylə Türk xalqlarının əsgəri xarakterinin qüvvətli olduğu ilə bağlı dünyanın fərqli ölkələrində çox sayda əsərlər qələmə alınmışdır. Zatən dünya tarixinin axışı üzərində azacıq təfəkkür etməmiz bunun həqiqət olduğunu anlamaq üçün kifayətdir. Çin səddindən Aralıq dənizinə Türklərin hardasa digər millətlərin toplamının qurduğu dövlət sayı qədər dövlətlər, imperatorluqlar qurduğu, hökmdar və sərkərdələrinin böyük ordulara yön verdiyi açıqdır. Cahan hakimiyyəti məfkurələri gərəyi insanlığn talehiylə bağlı qlobal baxışlara sahib olmaları, yaradılanı Yaradandan ötrü sevməyə çalışmaları, məzlumun yanında zalımın qarşısında yer alan inanc sisteminə, dəyərlərə olan bağlılıqları genetik kodlarında bulunan ədalətli bir nizam üçün güc formalaşdırmaq fikrini də qüvvətləndirmişdir. Ayrıca ticarətin qəlbinin döyündüyü İpəkyoluna nəzarət etmək, güzərgah coğrafiyalarını hakimiyəti altında tutaraq təhlükəsizlik və sabitlikdən məsul olmaq Türklərə fərqli dil, din və mədəniyyətə sahib karvanları, xalqları tolerantlıqla idarə etmək təcübəsi qazandırdığı kimi çox sayıda xalqa da rəfah və ədalət içində yüzilliklər boyu yan-yana yaşamaq imkanı vermişdir. Türklərin dövləti, ordu gücləri zəyiflədiyi zamanlar geniş coğrafiyalarda ədalət ve nizam anlayışını xaos və müstəmləkə istismarının əvəzlədiyi də bəllidir. Tarix bu həqiqəti də açıq bir şəkildə ortaya qoymuşdur ki, Türklər və onların hakimiyyət qurduqları mədəniyyət coğrafiyaları üçün birlik və ordu gücü bütün baxımlardan mühümdür. Bəzən bölünmüşlük gücün itirilməsinə, qüdrətli ordu paradiqmasının ortadan qalxmasına və geniş coğrafiyların fəlakətlə qarşılaşmasına da zəmin hazırlamışdır. Bu mənada xüsusiylə Çarlıq və Sovet işğalını yaşamış olan Türk cümhuriyyətlərinin milli istiqlallarını qorumaq, məfkurələrini həyata keçirmək adına tarixdən dərs almaları, orduları arasındakı əməkdaşlıqları artıraraq hərbi potensiyallarını gücləndirmələri olduqca önəmlidir. Bu mənada Türkiyə-Azərbaycan qardaşlığının hərbi sahədəki birgə fəaliyyətləri digər Türk respublikalarına da örnək mahiyyətindədir.
Sovet İttifaqının dağılmasından sonra hərbi müstəvidə Türkiyə və Azərbaycan arasında getdikcə dərinləşən, iki Oğuz ordusunun qardaşlıq ittifaqına qədər qüvvətlənən bir model ortaya qoyulmuşdur. İlk gündən etibarən müstəmləkə dövrü sonrasında Azərbaycanın Qarabağ başda olmaqla işğal və ərazi bütövlüyü problemi yaşadığını, regional təhlükəsizlik ehtiyacını diqqətə alan Türkiyənin hərbi elitası Bakının hərbi baxımdan güclənməsinə çalışmış, bunu Türkiyənin də regionda güclənməsi olaraq görmüş və mümkün olan dəstəyi əsirgəməmişdir. İki qardaş ölkə ordularının əməkdaşlığı yalnız Azərbaycan Silahlı Qüvvələrinin gücləndirilməsi baxımından deyil, eyni zamanda, bölgədə sabitlik və təhlükəsizliyin təmini, ortaq güc formalaşdırmaq yoluyla milli problemlərin həll edilməsi baxımından da mühüm əhəmiyyət kəsb etmişdir. 44 günlük müharibə sonrasında Azərbaycan Ordusunun əldə etdiyi Qarabağ zəfəriylə Cənubi Qafqazda yaranan yeni geopolitik güc balansı bütün yönləriylə təhlil edildiyi zaman Türkiyə-Azərbaycan ordularının hərbi əməkdaşlığının burada necə kritik bir rola sahib olduğu da anlaşılacaqdır. İki qardaş ölkə ordularının əməkdaşlığı yönündə ilk hüquqi addım 11 avqust 1992-ci ildə imzalanan hərbi təhsil sahəsində əməkdaşlıq haqqında müqavilənin bağlanmasıyla atılmış, Türkiyə Silahlı Qüvvələrinin təhsil müəssisələrində minlərlə azərbaycanlı zabit hazırlanmış, dəyişən şərtlərin ruhuna uyğun olaraq geopolitik güc və imkan dəngəsi içində, tədricilik metodologiyasıyla inkişaf edərək hərbi ittifaq səviyyəsinə qədər yüksəlmişdir. İki qardaş ölkə arasında qarşlıqlı milli maraqların təmin edilməsiylə birlikdə Türkiyə Silahlı Qüvvələri digər bir istiqamət olan Azərbaycanın NATO ilə birgə iş potensialının inkişaf etdirilməsi, Avroatlantik məkana inteqrasiyası məsələsində də əməkdaşlığa mühüm töhfələr vermişdir. Qərblə Şərqin qovuşduğu nəqliyyat dəhlizləri, neft-qaz boru xətləri, yollar baxımından olduqca strateji bir coğrafiyada yerləşən Azərbaycan, Avroatlantik məkanın təhlükəsziliyin təmini baxımından da önəmli olduğu üçün NATO-nun Sülh Üçün Əməkdaşlıq proqramına daxil edilmiş, bu fəaliyyətlər də Türkiyə vasitəsiylə həyata keçirilmişdir.
Azərbaycan Ordusunun zabit ehtiyacını qarşılayan ən önəmli təhsil müəsəsələrindən biri olan Bakı Ali Hərbi məktəbi də Türkiyənin aktiv iştirakı və köməyiylə NATO standartlarında təhsil verən təhsil ocağı halına gətirilmişdir. İndiyə qədər müdafiə nazirlirlikləri arasında təmənnasız hərbi yardım, maliyyə yardımı, müdafiə sənayesi, təlim-tədris və maddi-texniki təminat sahələrində əməkdaşlıq haqqında, “Kosovo Türk Taburu Görev Küvveti” tərkibində Kosovoya gedəcək Azərbaycan taqımının fəaliyyətinə dair saziş, Daxili Qoşunların şəxsi heyətinə Türkiyənin Quru Qoşunlarının Ali Hərbi Məktəbində təlim-tədris verilməsi haqqında protokol və digər çoxsaylı saziş və müqavilələr imzalanmış, 20 iyul 2016-cı ildə Azərbaycan prezidenti İ. Əliyevin imzaladığı fərmanla “Qızıl Şərq” hərbi şəhərciyində yerləşən bina və tikililər, Hacı Zeynalabdin qəsəbəsindəki aerodromda yerləşən bir terminal binası Türkiyə Silahlı Qüvvələri şəxsi heyətinin istifadəsi üçün ayrılmışdır.
2010-cu il sentyabrın 15-də imzalanmış müqaviləylə Azərbaycan və Türkiyənin Yüksək Səviyyəli Strateji Əməkdaşlıq Şurasının yaradılması əlaqələrin inkişafında yeni mərhələnin də əsasını qoymuşdur. Müqavilənin maddələrindən birinə görə, ölkələrdən hər hansı birinə qarşı hərbi hücüm həyata keçirilərsə hücuma uğramayan ölkə bütün imkanlarını istifadə edərək hücuma uğrayan ölkəni dəstəkləyəcəkdir. Bu müqavilə faktiki olaraq iki qardaş ölkənin hərbi ittifaq müqaviləsi olaraq da dəyərləndirilə bilər. İki ölkə ordularının müştərək fəaliyyətlərinin planlaşdırılması, əməliyyatların keçirilməsi üzrə qarşılıqlı fəaliyyət və döyüş uzlaşması imkanlarının öyrənilməsi, o cümlədən yerdən və havadan zərbələr endirməklə düşmən hədəflərinin məhv edilməsi tapşırıqlarının yerinə yetirirlməsiylə bağlı zirehli texnika, artilerya qurğuları, hərbi aviasiya və hava hücümündan müdafiə qüvvələrinin də cəlb edilməsiylə həyata keçirilən çox saylı birgə təlimlər də birlik və əməkdaşlığın önəmli istiqamətlərdən birini təşkil etməkdədir. Sadəcə 2020-ci ildə Azərbaycanla Türkiyə ordusu arasında 20-yə yaxın birgə təlim həyata keçirilmişdir. Qarabağ zəfəri sonrasında həyata keçirilən bu ilin də ilk təlimləri Qarsda davam etməkdədir. Qars müqaviləsinə görə Türkiyə Naxçıvanın təhlükəszliyinə də təminat verən ölkədir. Naxçıvan Əlahiddə Ümumqoşun Ordusunun təlimlərin, dərinləşən hərbi əməkdaşlığın önəmli iştirakçısından birinə çevrilməsi, Azərbaycan ictimaiyyətinin müxtəlif təbəqələri tərəfindən səsləndirilən Naxçıvanda Türkiyənin daimi hərbi bazasının yaradılmasının vaxtının gəldiyi yönündəki fikirlər Cənubi Qafqazda strateji güc balansı və təhlükəsizliyin təmini üçün Türkiyənin hərbi varlığıyla bölgədə iştirakının vacib olduğunu ortaya qoyur.
Gündən-günə qüvvətlənən hərbi sənayesiylə gəmi inşaatından müxtəlif silah sistemlərinə Türkiyənin Azərbaycanla birgə istehsalı da gündəminə alması qardaşlıq ittifaqının müdafiə sənayesində də müştərək layihələr həyata keçirərək ordularının gücünə güc qatacağını göstərir. Qarabağ zəfəri sonrasında Ankaradan gələn hərbi heyəti qəbulunda Azərbaycan prezidenti İ. Əliyevin bölgədə təhlükəsizlik və sabitlik üçün iki qardaş ölkə ordularının inteqrasiyasının daha da dərinləşdirilməsinin vacibliyi haqdakı sözləri, müharibədə Azərbaycan Ordusuna böyük üstünlük qazandıran Türkiyə istehsalı Bayraktarları mədh edərək Azərbaycanın xaricdən silah alımında da yaxın zamanlarda Ankaranın ilk sıralara yüksələcəyini ifadə etməsi iki qardaş ölkənin hərbi əməkdaşlığının inkişaf səviyyəsini göstərmək baxımından mühümdür.