“Şuşanın tək incisi” və “Qarabağın cizgiləri”

  27 may 2024-cü il tarixində Türk Mədəniyyəti və İrsi Fondu tərəfindən paytaxt Bakının Nizami Kino Mərkəzində 28 May Azərbaycan Respublikasının Müstəqillik Gününə həsr olunmuş “Qarabağın cizgiləri” adlı sərginin açılışı və “Şuşanın tək incisi” adlı sənədli filmin təqdimatı keçirilib.

  Azərbaycan Milli Geyim Mərkəzinin rəhbəri, sənətşünaslıq üzrə fəlsəfə doktoru, “Cizgi” brendinin yaradıcısı, dizayner Gülnarə Xəlilovanın hazırladığı, üzərində Qarabağ bölgəsindən olan görkəmli şəxsiyyətlərin portretlərinin işləndiyi ipək yaylıqlardan ibarət sərgi tamaşaçılar tərəfindən maraqla qarşılanıb.

  Tədbirdə Türk Mədəniyyəti və İrsi Fondu tərəfindən hazırlanmış XIX əsr Azərbaycanın görkəmli şairəsi, sonuncu Qarabağ xanı Mehdiqulu xanın qızı Xurşidbanu Natəvana həsr olunmuş “Şuşanın tək incisi” adlı sənədli film nümayiş olunub. Film layihəsi fond tərəfindən Xurşidbanu Natəvanın 190 illiyinin qeyd olunması və Şuşanın “Türk dünyasının mədəniyyət paytaxtı” elan edilməsi ilə əlaqədar 2023-cü ildə işlənib, dünyanın müxtəlif ölkələrində göstərilib. “Şuşanın tək incisi” adlı sənədli filmin ideya müəllifi, Türk Mədəniyyəti və İrsi Fondunun ilk prezidenti Günay Əfəndiyeva, ssenari müəllifi Ülviyyə Heydərova, quruluşçu rejissoru Zəhra Quliyevadır.

  Türk Mədəniyyəti və İrsi Fondunun prezidenti Aktotı Raimkulova təşkilat tərəfindən Azərbaycan Respublikasının Müstəqillik Gününə həsr olunmuş layihələrin əhəmiyyətini qeyd edib, sözügedən layihələrin həyata keçirilməsinin Azərbaycanın tarixinin, mədəni irsinin qorunub saxlanılmasına, milli dəyərlərinin təbliğinə mühüm töhfə verəcəyinə inandığını söyləyib.

  Tədbirdə Azərbaycanda akkreditə olunan diplomatik korpusun nümayəndələri, millət vəkilləri, mədəniyyət və incəsənət xadimləri, KİV təmsilçiləri, eləcə də Bakıdakı müxtəlif təhsil ocaqlarının tələbələri iştirak ediblər.