Vaşinqtonda Türk Festivalı keçirilib

Amerika Birləşmiş Ştatlarının (ABŞ) paytaxtı Vaşinqtonda keçirilən ənənəvi Türk Festivalı bu il də maraqla qarşılanıb.

Vaşinqton Türk-Amerika Dərnəyi (ATA-DC) tərəfindən hər il təşkil edilən Türk Festivalı bu il Pensilvaniya prospektində, Konqres binasının qarşısında keçirilib.

Festivala Türkiyenin Vaşinqtondakı səfiri Hasan Murat Mercan da gəlib, stendləri ziyarət edib, iştirakçılarla xatirə şəkli çəkdirib.

Türk mədəniyyətinin və mətbəxinin görkəmli nümunələrinin təqdim olunduğu festivalda folklor kollektivinin çıxışları xüsusi diqqət çəkib.

Uşaqlar üçün oyunların təşkil olunduğu festivalda iştirakçılar canlı musiqi və mədəniyyət tədbirlərilə əyləniblər.

Osmanlı-Türk mədəniyyətini əks etdirən məhsulların nümayiş olunduğu stendlər iştirakçıların marağına səbəb olub. Ziyarətçilər tərəfindən əllə toxunmuş türk xalçaları, ənənəvi Osmanlı geyimləri və çini məhsullarına baxış keçirilib.

Festival 20 mindən çox ziyarətçiyə ev sahibliyi edib.