İstanbulda “Türk Şurası sosial media tədris proqramı” mövzusunda təlim proqramı keçirilir

İyulun 29-30-da İstanbulda “Türk Şurası sosial media tədris proqramı” mövzusunda təlim proqramı keçirilir.

Tədbir Prezident Administrasiyasının İctimaiyyətlə əlaqələr idarəsinin ev sahibliyi və Türkdilli Dövlətlərin Əməkdaşlıq Şurasının (Türk Şurası) birgə təşkilatçılığı ilə baş tutub.

Tədbir çərçivəsində Türk Şurasının Media və informasiya sahəsində Koordinasiya Komitəsinin birinci iclası da keçirilib.

Tədbir Prezident Administrasiyasının ictimaiyyətlə əlaqələr idarəsinin rəhbəri Fəxrəddin Altunun iştirakçılara ünvanlanan videomüraciəti ilə başlayıb. Videomüraciətdə Türk Şurasının ölkələrimiz arasındakı mövcud möhkəm əlaqələrin daha da gücləndirilməsi baxımından əhəmiyyətini vurğulayan F.Altun bu tədbirin türkdilli ölkələr və bütün dünyadakı soydaşlarımız üçün faydalı olmasını diləyib. Eyni zamanda, Türk Şurasının ortaq tarixə, mədəniyyətə, dilə, dinə və mənşəyə malik ölkələrimiz arasındakı möhkəm bağları daha da gücləndirdiyini, Şuranın beynəlxalq aləmdə mühüm platformaya çevrildiyini qeyd edib.

Tədbirə türkdilli ölkələrin dövlət qurumlarının təmsilçiləri qatılıblar. Türkiyə, Azərbaycan, Qazaxıstan, Özbəkistan, Qırğızıstan, və Macarıstandan olan iştirakçılar iki gün ərzində sosial media platformasında mənfi tendensiyalara xidmət edən dezinformasiyanın düzgün qiymətləndirilməsi və ona qarşı mübarizə mövzusunda təlimlərdə iştirak edəcəklər.

Təlimlərdə “Sosial media istifadəçiləri və dezinformasiyaya qarşı mübarizə”, “Türkiyədə İnternet hüququ və tətbiqlər”, “Texnoloji transformasiya və kibertəhlükəsizlik təhdidləri” və digər mövzularda müzakirələr keçirilir.

“Qarabağ müharibəsində sosial mediada istifadə imkanları və dezinformasiyaya qarşı mübarizə” mövzusunda keçirilən təlimdə Vətən müharibəsində Azərbaycanın sosial informasiya sahəsində üzləşdiyi ikili standartlar, ölkəmizin haqlı mübarizəsinin dünyanın müxtəlif sosial resursları tərəfindən yanlış təqdim edilməsi, bu hallara qarşı mübarizə metodları, Türkiyənin bu kibermübarizədə Azərbaycana verdiyi dəstək və Türkiyə təcrübəsi müzakirə olunub.