Fələstində yeni hökümətin andiçmə mərasimi keçirilib

Fələstində Məhəmməd Mustafanın başçılığı altında yeni hökumət Qəzzanın "idarəsi proqramı" ilə prezident Mahmud Abbasın hüzurunda and içib.

Fələstin xəbər agentliyi WAFA-nın məlumatına görə, hökumətin Nazirlər Şurasının ilk iclasına sədrlik edən Mahmud Abbas qeyd edib ki, yeni hökumətin vəzifələrinə işğal altındakı İordan çayının qərb sahili, eləcə də Şərqi Qüds və Qəzza zolağı daxildir və onun tam qanun çərçivəsində öz vəzifələrini yerinə yetirmək səlahiyyəti var.

Hökumətin geniş institusional islahatlar həyata keçirməyi və bütün fələstinlilərə yaxşı xidmətlər göstərməyi hədəflədiyini bildirən Abbas əlavə edib: “Biz Qəzza zolağında humanitar yardım səylərini, Qəzza və İordan çayının qərb sahilində yenidənqurma işlərini və Fələstin iqtisadiyyatının canlandırılmasını maksimum dərəcədə artırmağa çalışacağıq".

Qəzzaya hücumların, İsrailin və Qüds daxil olmaqla İordan çayının qərb sahilindəki məskunlaşanların hücumlarını dayandırmaq üçün ərəb və beynəlxalq tərəflərlə işləməyə davam etdiklərini qeyd edən Abbas “Bizim siyasi məqsədimiz azadlığa, müstəqilliyə nail olmaq və işğaldan xilas olmaqdır. Eyni zamanda, Fələstin Dövlətinin Birləşmiş Millətlər Təşkilatına tam üzvlük əldə etmək üçün müvafiq ərəb və beynəlxalq tərəflərlə işləyəcəyik" deyib.

M.Abbas Fələstin torpaqlarının birləşdirilməsi və milli barışığa nail olmaq üçün çalışmağa davam edəcəklərini bildirərək, yeni hökumətin Fələstinin bütün bölgələrində, xüsusilə də işğal altında olan Şərqi Qüdsdə ümumi və prezident seçkiləri keçirməyə hazırlaşmalı olduğunu bildirib.

Xatırladaq ki, Fələstin Rəhbərliyi 2021-ci ildə ümumi seçkilərin keçiriləcəyini açıqlasa da, İsrailin işğal etdiyi Şərqi Qüdsdə seçkilərin keçirilməsinə icazə vermədiyi üçün seçkilər ləğv edilib.

Fələstində sonuncu ümumi seçkilər 2006-cı ildə keçirilib.

İsrailin Qəzzaya hücumlarının yaratdığı humanitar fəlakətdən sonra Fələstinin Baş naziri Məhəmməd Ştiyye fevralın 26-da 2019-cu ildən tutduğu vəzifəsindən istefa verdiyini açıqlayıb.

Fələstin prezidenti Mahmud Abbas martın 14-də yeni hökuməti qurmaq üçün Fələstin Milli Fondunun direktoru Məhəmməd Mustafanı təyin edib. Baş nazir Mustafa martın 28-də yeni kabinetini Abbasa təqdim edib və Abbas prezident fərmanı ilə hökumətə etimad səsverməsi verib.