İsrailin hücumları nəticəsində həyatını itirən fələstinlilərin sayı 28 min 775-ə yüksəlib

İsrailin xalqı ac-susuz qalmağa məcbur etdiyi Qəzza zolağına hücumlarında həyatını itirən fələstinlilərin sayı 28 min 775-ə yüksəlib.

Fələstin Səhiyyə Nazirliyinin Qəzza üzrə sözçüsü Əşrəf əl-Qudra İsrailin 133 gündür Qəzza zolağına etdiyi hücumlarla bağlı məlumat verib.

İsrail qüvvələrinin son 24 saatda Qəzza zolağında daha 112 fələstinlini öldürdüyünü qeyd edən Kudra Qəzzada ölənlərin sayının 28 min 775-ə yüksəldiyini bildirib.

Kudra İsrail qüvvələrinin son hücumlarında daha 157 fələstinlini yaraladığını və Qəzza zolağında yaralananların ümumi sayının 68 min 552-yə yüksəldiyini qeyd edib.

Kudra dağıntılar altında və yol kənarında hələ də ölənlərin olduğunu, lakin İsrail qüvvələrinin maneəsinə görə tibb qrupları və mülki müdafiə işçilərinin cəsədlərə çata bilmədiyini vurğulayıb.

Digər tərəfdən, İsrailin Baş naziri Binyamin Netanyahu Fələstin dövlətinin tanınması ilə bağlı beynəlxalq birtərəfli münasibətin əleyhinə olduğunu bildirərək, fələstinlilərlə daimi razılaşmaya dair beynəlxalq tələbləri rədd edib.

Netanyahu "X" sosial media hesabında etdiyi paylaşımda "Fələstin dövlətinin qurulmasında İsrailə təzyiq edilməsi qarşısında mövqeyimi Təhlükəsizlik Şurasında açıq şəkildə ifadə etdim" deyib.

Fələstinlilərlə daimi razılaşma ilə bağlı beynəlxalq diktələri qəti şəkildə rədd etdiklərini qeyd edən Netanyahu belə bir şeyin yalnız tərəflər arasında ilkin şərt olmadan birbaşa danışıqlar yolu ilə əldə edilə biləcəyinə diqqət çəkib.

İsrailin Fələstinin tanınması istiqamətində beynəlxalq təktərəfli addımlara qarşı mövqeyini davam etdirəcəyini bildirən baş nazir "7 oktyabr (Həmas) hücumundan sonra belə bir addımın terroru mükafatlandırmaq mənasına gəldiyini" iddia edib.