İsrail jurnalistlərin izində

  İsrailin Qəzza zolağında 2023-cü il oktyabrın 7-dən bəri davam edən hücumları indiyədək onlarla jurnalistin həyatına son qoyub. Bu yaxınlarda bölgədə daha iki fələstinli jurnalist öldürülüb. “Əl-Cəzirə” İsraili mətbuat azadlığı prinsiplərini pozmaqda ittiham edib.

  “Əl-Cəzirə” televiziyasının məlumatına görə, Qəzza zolağında İsrailin hücumu nəticəsində iki fələstinli jurnalist həlak olub: AFP xəbər agentliyində işləyən videojurnalist Mustafa Turiya və “Əl-Cəzirə”nin müxbiri Həmzə Vael Dahduh bazar günü avtomobilləri hədəfə alınan hücumda öldürülüblər.

  Təxminən 30 yaşı olan M.Turiya 2019-cu ildən AFP-də videojurnalist olaraq çalışır, Qəzza zolağından AP, “Reuters” xəbər agentlikləri və “Əl-Cəzirə” ilə CNN televiziya kanalları üçün reportaj verirdi. Onunla birlikdə öldürülən H.V.Dahduh Qəzza zolağında “Əl-Cəzirə” ofisini idarə edən və müharibə başlayandan qısa müddət sonra İsrailin hücumu nəticəsində həyat yoldaşını və digər iki uşağını itirən Vael əl-Dahduhun oğlu idi.

  Turiya və Dahduh İsrailin Rəfahdakı hücumundan sonra bir evə dəymiş ziyanı sənədləşdirmək üçün bazar günü Qəzza zolağına getmişdilər. Onlar geri dönərkən avtomobillərinə hücum edildi. Şahidlərin AFP-yə verdiyi məlumata görə, avtomobil iki İsrail raketi ilə vurulub. İkinci raket birbaşa sərnişin oturacağında əyləşən Dahduhun üstünə düşüb. Avtomobildə olan üçüncü jurnalist Hasem Rəcəb isə ağır yaralanıb.