MAQATE: ''Şimali Koreyanın ikinci nüvə reaktoru fəaliyyətə başladı''

Beynəlxalq Atom Enerjisi Agentliyi (MAQATE) Şimali Koreyanın ikinci nüvə reaktorunun işə salındığını açıqlayıb.
Birləşmiş Millətlər Təşkilatının tərkibində fəaliyyət göstərən Beynəlxalq Atom Enerjisi Agentliyi və müstəqil nüvə mütəxəssislərinin cümə axşamı verdiyi açıqlamaya görə, Şimali Koreyanın Yonbyon nüvə kompleksində yeni reaktor ilk dəfə fəaliyyətə başlayıb.
MAQATE Şimali Koreyanın illərdir Yonbyondakı 5 meqavatlıq nüvə reaktorundan işlənmiş yanacaqdan plutonium istehsal etmək üçün istifadə etdiyini açıqladı, lakin daha böyük yüngül su reaktorundan qaynar suyun görünməsinin ikinci reaktorun da işə salındığını göstərdiyini bildirib.
“İsti suyun axıdılması reaktorun kritik həddə çatmasının göstəricisidir”, - MAQATE Baş direktoru Rafael Qrossi bildirib.
Əldə edilən görüntülər peyk vasitəsilə verilir.