İsrailin Qəzzaya hücumlarına beynəlxalq ictimaiyyətin reaksiyası davam edir

Qəzzada zorakılıq və dağıntıları davam etdirən İsrailə dünyanın bir çox ölkəsindən reaksiyalar gəlməkdə davam edir.

Pakistan Xarici İşlər Nazirliyi İsrailin Qəzzanı qəsdən fələstinlilər üçün yaşayış üçün yararsız hala gətirdiyini açıqlayıb.

Pakistan Xarici İşlər Nazirliyinin sözçüsü Mümtaz Zehra Bəluç İsrailin mülki infrastrukturu və parlament binası kimi idarəetmə simvollarını məhv edərək Qəzzanı qəsdən fələstinlilər üçün yaşayış üçün yararsız hala saldığını bildirib.

Həftəlik mətbuat konfransında verdiyi açıqlamada Bəluç İsrailin xəstəxanaları, müxtəlif humanitar təşkilatlara aid strukturları, o cümlədən Birləşmiş Millətlər Təşkilatının Fələstinli Qaçqınlara Yardım Agentliyi (UNRWA) və bu qurumların əməkdaşlarını bombaladığını bildirib:

“İsrailin arxasında duranlar bu ölkənin Fələstin xalqına qarşı etnik təmizləmə planını həyata keçirməsinə mane olmalıdırlar”. 

İsrailin beynəlxalq qanunlara tamamilə məhəl qoymadan davamlı olaraq xəstəxanaları hədəf aldığını vurğulayan Bəluç beynəlxalq ictimaiyyəti "İsrail işğalçı qüvvələrini xəstəxanalara hücumlarından məsul tutmağa" çağırıb.

İordaniya İsrailə günəş enerjisi təmin edilməsi üçün imzalanan razılaşmadan çıxacağını açıqlayıb.

İordaniya Xarici İşlər Naziri Ayman Safadi verdiyi açıqlamada İordaniyanın İsrailə duzsuzlaşdırılmış su verməsi müqabilində Birləşmiş Ərəb Əmirliklərinin vasitəçiliyi ilə İsrailə günəş enerjisi verməklə bağlı razılaşmadan çıxacağını açıqlayıb.

"İsrail bütün bölgəni cəhənnəmə doğru itələdi. Bunun nəticələrinə dözmək məcburiyyətində qalacaq", -deyə Safadi qeyd edib.

Norveçdə parlamentdəki partiyaların əksəriyyəti hökumətin müstəqil Fələstin dövlətini tanımağa “hazır” olmaq təklifini qəbul edib.

Norveç mətbuatında yer alan xəbərlərə görə, hökumət müstəqil Fələstin dövlətini tanımağa “hazır olmaq” ilə bağlı parlamentə təklif təqdim edib.

Təklifdə qeyd edilib ki, hökumət “hər hansı yekun sülh sazişindən asılı olmayan, sülh prosesinə müsbət təsir göstərdiyi halda müstəqil Fələstin dövlətinin qeyd-şərtsiz tanınması” çağırışı edib.

Digər tərəfdən, parlamentdəki partiyaların əksəriyyətinin qəbul etdiyi təklifdə Fələstin dövlətinin “dərhal tanınmayacağı” ifadəsi yer alıb.