İsrail gecə basqınlarında çox sayda fələstinlini həbs edib

İsrail Qəzza zolağına havadan və qurudan hücumlarını davam etdirərkən, işğal altındakı İordan çayının qərb sahilində bir çox qəsəbəyə təşkil etdiyi basqınlarda çox sayda fələstinlini həbs edib.
Fələstinin rəsmi xəbər agentliyi WAFA-nın verdiyi xəbərə görə, İsrail əsgərləri Yerixo şəhərinin cənubundakı Aqaba Cabr qaçqın düşərgəsinə basqınlar zamanı gecə saatlarında girdikləri evlərdən 9 Fələstin vətəndaşını özləri ilə aparıb.

Düşərgədə hərbi buldozerlərin müşayiəti ilə basqınlar davam edir.

Yerli mənbələrin məlumatına görə, İsrail əsgərləri Əl-Xəlil şəhərinin cənubundakı Beni Naim qəsəbəsindəki evlərə girərək gecə yoxlamaları apararaq qəsəbədən 11 fələstinlini saxlayıb.

İsrail əsgərləri Ramallahın şimal-qərbindəki Beyt-Rima qəsəbəsinə də oxşar basqınlar həyata keçirib və 11 fələstinlini saxladıqdan sonra oranı tərk ediblər.

Digər tərəfdən, İsrailin Qəzza zolağına hücumları Ramallah şəhəri və Əl-Cəlzun qaçqınlar düşərgəsində iki nümayişlə etiraz edilib.

İordan çayının qərb sahilinin bir çox bölgəsində İsrail əsgərləri ilə fələstinli gənclər arasında müxtəlif gərginliklər baş verib.