Cozef Borrel Qәrbi Balkan ölkәlәrinin liderlәri ilә görüşüb

Avropa İttifaqının xarici әlaqələr və təhlükəsizlik siyasəti üzrə ali nümayəndəsi Cosef Borrel Brüsseldә  Qərbi Balkan ölkәlәrinin  liderlәri  ilə görüşüb.

Borrelin verdiyi qeyri-rəsmi şam yeməyində Serbiya prezidenti Aleksandr Vuçiç, Albaniyanın baş naziri Edi Rama, Kosovo baş nazirinin müavini və xarici işlər naziri Donika Qervalla-Şvars, Şimali Makedoniyanın baş naziri Dimitar Kovacevski və Bosniya və Herseqovina Prezident Şurasının serb üzvü Milorad Dodik iştirak edib.

Borrell görüşdən əvvəl etdiyi çıxışda Aİ-nin hər il ənənəvi şəkildə 6 ölkənin liderini bir araya gətirməsindən məmnunluğunu ifadə edib.

Rusiyanın Ukraynaya hücumunun regional və qlobal təsirlərini qiymətləndirəcəklərini ifadə edən Borrel deyib: "Rusiya bizim və bölgənin zəifliklərindən istifadə etmək istəyir. Rusiyanın bunlardan istifadə etməsinə imkan verməmək üçün birlikdə çalışmalıyıq. Rusiyanın bölgәdәki dağıdıcı hərəkətlərinə qarşı birgə hərəkət etməliyik’’.

Mayın 16-da keçiriləcək Avropa ittifaqına üzv ölkәlәrin XİN rәhbәrlәrinin iclasında Qərbi Balkanlar məsələsinin ətraflı müzakirə ediləcəyini bildirən Borrel iclasa bölgә ölkələrinin xarici işlər nazirlərini dəvət edəcəyini vurğulayıb.