Pakistanda keçmiş Baş nazir İmran Xanın tərəfdarları etiraz aksiyası keçirib
Pakistan Ədalət Hərəkatı Partiyasının (PTI) lideri Xanın çağırışı ilə Kəraçi, Lahor, Pişəvər, Multan və bir çox şəhərlərdə, xüsusən də paytaxt İslamabadda nümayişlər keçirilib.
Yerli mətbuatın məlumatına görə, Pakistan Ədalət Hərəkatı Partiyasının (PTI) lideri Xanın çağırışı ilə Kəraçi, Lahor, Pişəvər, Multan və bir çox şəhərlərdə, xüsusən də paytaxt İslamabadda nümayişlər keçirilib.
Paytaxt İslamabadda çox sayda insan öz maşınları ilə karvan təşkil edib. Əllərində Pakistan və PTI bayraqları tutan nümayişçilər İmran Xanı dəstəkləyən şüarlar səsləndirərkən, PTI liderinin vəzifədən uzaqlaşdırılmasını təmin edən rəqib partiyalara da reaksiya veriblər.
Digər tərəfdən, keçmiş baş nazir və PTI lideri Xan "Twitter"də etdiyi paylaşımda "yerli xainlərə və ABŞ-ın dəstəklədiyi rejim dəyişikliyinə" etiraz edən pakistanlılara təşəkkür edib.
Xan qeyd edib ki, Pakistan 1947-ci ildə müstəqil olub, lakin xarici rejim dəyişikliyi planlarına qarşı azadlıq mübarizəsi bu gün yenidən başlayıb.
Qeyd edək ki, aprelin 10-da Pakistanda parlamentə etimadsızlıq səsverməsi nəticəsində İmran Xanın hökuməti süqut edib.
Aprelin 9-da yerli vaxtla saat 11:30-da başlayan etimadsızlıq səsverməsi dünən saat 01:00-da başa çatıb.
Parlamentdə keçirilən etimadsızlıq səsverməsində 174 nəfər Baş nazir İmran Xanın hökumətinin əleyhinə səs verib.
