İbrahim Rəisi: "Hər hansı “tiranlığa” sərt cavab verəcəyik"

İran Prezidenti İbrahim Rəisi ölkəsinin müharibəyə başlamaq niyyətində olmadığını, lakin hər hansı “tiranlığa” sərt cavab verəcəklərini bildirib.

İranın rəsmi xəbər agentliyi İRNA-nın məlumatına görə, İ.Rəisi Fars körfəzi sahillərində yerləşən Hörmüzqan əyalətinə səfəri zamanı ictimaiyyətə müraciət edib.

İ.Rəisi son günlər Amerika Birləşmiş Ştatları (ABŞ) ilə artan gərginliyə toxunaraq, “Biz müharibəyə başlamayacağıq, lakin hər hansı bir ölkə və ya güc qəddarlıq etmək istəsə, İran onlara sərt cavab verəcək” deyib.

Qeyd edək ki, yanvarın 28-də İordaniya-Suriya sərhədindəki ABŞ hərbi bazasına kamikadze pilotsuz təyyarə ilə həyata keçirilən hücumda 3 ABŞ əsgəri şəhid olub, 40-dan çox əsgər yaralanıb.

ABŞ rəsmiləri, xüsusilə prezident Co Bayden İranın dəstəklədiyi qrupların hücuma görə məsuliyyət daşıdığını və hücuma ABŞ-ın seçdiyi vaxt və yerdə cavab veriləcəyini bildirib.

İran sözügedən hücumla əlaqəsi olduğuna dair iddiaları təkzib edərək, "Bölgədəki müqavimət qüvvələri öz qərar və hərəkətlərində İrandan təlimat almır” ifadəsini işlədib.