Eronda ro'y bergan zilzila Turkiyaning ba’zi viloyatlarida ham sezildi
Turkiyaning Van viloyati Bashkale tumanida ham sezilgan zilzilada 8 kishi halok bo’lgan.
Eronning Sharqiy Ozarbayjon viloyati Koy tumanida sodir bo’lgan 5.9 bal zilzila Turkiyaning ba’zi viloyatlarida ham sezildi.
Turkiyaning Van viloyati Bashkale tumanida ham sezilgan zilzilada 8 kishi halok bo’ldi.
Bu haqda Turkiya ichki ishlar vaziri Sulaymon So’ylu ma’lum qildi.
Vazirning ta’kidlashicha, bugun Erondagi zilziladan so’ng, Vanda 8 kishi hayotdan ko’z yumgan. Ulardan 3 nafari yosh bola. 21 kishi jarohatlangan. Ulardan 8 nafari og’ir ahvolda. Vayronalar tagida qolganlarni qutqarish uchun operatsiya davom etmoqda.
Tehron Universiteti Seysmologiya markazi ma’lum qilishicha, zilzila bugun mahalliy vaqt bilan soat 09:22 da ro’y bergan bo’lib, uning o’chog’i Sharqiy Ozarbayjonning Koy tumanida joylashgan. Eronda 25 kishi zilzila oqibatida jarohatlangan. Qurbonlarning yo’qligi aytilmoqda. 43 ta qishloqda uylar vayron bo’lgan.
Yerning 6 km tagida yuzaga kelgan zilzila Turkiyaning Van viloyati, shuningdek, atrofdagi shahar va tumanlarda ham sezilgan.
Zilziladan zarar ko’rgan Van viloyati Bashkale tumanida g’ishtdan qurilgan eski uylar vayron bo’lgan.