Turkiyadagi o‘zbeklar Prezident saylovida muddatidan oldin ovoz berishi mumkin
Turkiyaning “Demiroren” axborot agentligi tomonidan O‘zbekistonning Istanbuldagi bosh konsulli Amirsaid Agzamxodjayev bilan bo‘lajak muddatidan ilgari O‘zbekiston Prezidenti saylovi jarayonlariga bag‘ishlangan video va matn shaklda eʼlon qilindi
Turkiyaning “Demiroren” axborot agentligi tomonidan O‘zbekistonning Istanbuldagi bosh konsulli Amirsaid Agzamxodjayev bilan bo‘lajak muddatidan ilgari O‘zbekiston Prezidenti saylovi jarayonlariga bag‘ishlangan video va matn shaklda eʼlon qilindi.
"O‘zbekiston Respublikasining bosh konsuli A.Agzamxodjayev Prezidentimiz 3 yillik vakolat muddatidan voz kechib, muddatidan oldin saylov o‘tkazishni eʼlon qildi" sarlavhali suhbatda joriy yilning 9 iyul kuni O'zbekistonda bo‘lib o‘tadigan muddatidan ilgari O‘zbekiston Prezidenti saylovi jarayonlari haqidagi batafsil maʼlumotlar o‘quvchilar eʼtiboriga havola qilingan.
"O‘zbekiston Prezidenti Shavkat Mirziyoyev muddatidan oldin saylovlarni eʼlon qilib, xalqimizga o‘zi xohlagan rahbarni tanlash imkoniyatini berdi. Joriy yilning 30 aprel kuni O‘zbekiston Konstitutsiyasiga o‘zgartishlar kiritish bo‘yicha referendum bo‘lib o‘tdi. Unda fuqarolarimizning 90,2 foizi ishtirok etib, ovoz berdi. Referendum asosida qabul qilingan yangilangan Konstitutsiya 1 maydan kuchga kirdi. Shu nuqtai nazardan, davlatimiz rahbari yangilangan Konstitutsiyada belgilangan barcha vazifalarni bajarish uchun xalqimiz tanlaydigan yangi Prezident saylanishi kerakligini taʼkidlab, vakolat muddatining qolgan 3 yilidan voz kechdi", - deydi bosh konsul.
Intervyuda prezidentlikka nomzodlar haqidagi maʼlumotlar ham qayd etilgan.
"Davlat rahbarligi uchun kechadigan saylovda mamlakatimizda ro‘yxatdan o‘tgan siyosiy partiyalar tomonidan nomzodlar ko‘rsatildi. Jumladan, O‘zbekiston Xalq demokratik partiyasidan Ulug‘bek Inoyatov, Tadbirkorlar va ishbilarmonlar harakati - Liberal-demokratik partiyasidan amaldagi davlat rahbari Shavkat Mirziyoyev “Adolat” sotsial-demokratik partiyasidan Robaxon Maxmudova, “Ekologik” partiyadan Abdushukur Xamzayev davlat rahbarligi uchun kechadigan saylovda kurash olib bormoqda", deya taʼkidlaydi diplomat.
Nashrda O‘zbekiston Markaziy saylov komissiya maʼlumotlari asosida 10784 saylov uchastkalari tashkil etilgani maʼlum qilingan. Bosh konsul 39 ta xorijiy davlatlarda 56 ta saylov uchastkalari tashkil etilganini bildirgan.
"Turkiyada ikkita joyda saylov uchastkasi tashkil etiladi. O‘zbekistonning Anqaradagi elchixonasida va Istanbuldagi Bosh konsulxonada tashkil etilgan saylov uchastkalarida Turkiyada bo‘lgan yurtdoshlarimiz o‘z tanlovlarini amalga oshirishlari mumkin", deydi Amirsaid Agzamxodjayev.
Suhbat davomida, shuningdek, Turkiyadagi O‘zbekiston fuqarolari Prezident saylovida muddatidan oldin 28 iyundan 5 iyulgacha ovoz berishlari mumkinligi taʼkidlangan.