Turkiyaga kelgan Mudofaa vazirligining tibbiy otryadi Toshkentga qaytdi

Turkiyada 24 kun davomida zilzila oqibatlarini bartaraf etishda ishtirok etgan O‘zbekiston Mudofaa vazirligining malakali harbiy xizmatchilari Toshkentga qaytib bordi. Bu haqida O‘zbekiston Mudofaa vazirligi, Axborot va ommaviy kommunikatsiyalar departamenti ma’lumot bo‘lishdi.

Ushbu ma’lumotga ko‘ra O‘zbekiston Respublikasi Prezidenti, Qurolli Kuchlar Oliy Bosh Qo‘mondoni Shavkat Mirziyoyevning topshirig‘iga binoan shu yilning 8-fevral kuni Mudofaa vazirligining malakali harbiy xizmatchilaridan iborat tibbiy otryadi zilzilalar oqibatlarini bartaraf etishda yordam berish hamda zilziladan jabrlanganlarga tibbiy yordam ko‘rsatish maqsadida Turkiya Respublikasiga yo‘l oldi.

O‘zbekistonlik harbiy xizmatchilar qariyb bir oy davomida zilzilalardan jabr ko‘rgan turk xalqiga insonparvarlik yordami ko‘rsatib, og‘ir damlarda qo‘llab-quvvatlab, ularga kamarbasta bo‘lishdi. Shu vaqt davomida ular jami 3860 nafar fuqaroga tibbiy yordam ko‘rsatgan. Ulardan 1795 nafari erkaklar, 1177 nafari ayollar va 888 nafarini esa bolalardan iborat.

Bugun, 6-mart kuni Islom Karimov nomidagi Toshkent xalqaro aeroportida Mudofaa vazirligining tibbiy otryadi xodimlarini ommaviy axborot vositalari, keng jamoatchilik vakillari, mudofaa vazirining o‘rinbosari va boshqa rasmiylar kutib oldi.