erdoghan «23 – aprél milliy igilik hoquq we balilar bayrimi» ni tebriklidi
jumhur reis rejep tayyip erdoghan dunyaning herqaysi jayliridiki barliq balilarning «23 – aprél milliy igilik hoquq we balilar bayrimi» ni tebriklidi.
türkiye awazi radiyosi xewiri: erdoghan «23 – aprél milliy igilik hoquq we balilar bayrimi» we türkiye büyük millet mejlisi qurulghanliqining 100 – yilliqi munasiwiti bilen ammiwi ortaqlishish tor béti Twitter sehipiside élan qilghan bayanatida mundaq dédi: «türkiye büyük millet mejlisi qurulghanliqining 100 – yilliqi we <23 – aprél milliy igilik hoquq we balilar bayrimi> ni qizghin tebrikleymen.»
uchurida, balilar bilen bille bolghan foto süretlirigimu orun bérilgen bir widéoni hembehirleshken jumhur reis erdoghan, balilargha mundaq xitab qildi: «kündilik hayatta bir balining külümsirishidinmu chong bext, bir balining könglini xush qilishtinmu katta unwan yoqtur. urushlar, toqunushlar, acharchiliqlar we qehetchilikler éngimiz hem közimizni perdiliwalghan bir dewrde, dunyani güzelleshtüridighan yégane amil, siz qedirdan balilarning tebessumidur. siler bizning kélechikimizning kapaliti, etimizning ümidi hésablinisiler. derweqe, siler téximu huzurluq, téximu bext – saadetlik we téximu adaletlik, téximu istiqbali parlaq bir dunyaning xush xewerchisi bolisiler. chünki, bala bolush démek, jushqun ruhluq bolush, dunyagha aq köngüllük, mesum közler bilen nezer tashlash we etige cheksiz hayajan ilkide qedem tashlash démektur. bala bolush démek, dilidiki cheksiz, payansiz söygüge mehkem yépishish démektur. xudayim buyrusa, siler ete birer senetchi, siyasetchi, adlim, oqutquchi, inzhénér, qanunshunas, karxanichi, yaki bashqa istidatliq zatlardin bolisiler. shu chaghda, kemchil terepliringlarni toluqlap, silerdin kéyinki ewlatlar üchün téximu adil, téximu güzel bir dunyani siler berpa qilisiler. <23 – aprél milliy igilik hoquq we balilar bayrimi> nglarni qizghin tebrikleymen, bu bayramni hediye qilghan jumhuriyitimizning qurghuchisi ghazi mustapa kamal atatürk we sepdashlirini yene bir qétim cheksiz iptixarliq we minnetdarliq tuyghusi ichide yad étimen. aililiringlar, oqutquchiliringlar we dostliringlar bilen birlikte qanchilighan bayramlarni xushal – xuram ötküzüshünglargha tilekdashmen.»
