yaponiyede 2019 – yli «türkiye yili» élan qilinidu
medeniyet we sayahet ishliri ministiri numan qurtulmush yaponiyede 2019 – yli «türkiye yili» élan qilinidighanliqini éytti.
türkiye awazi radiyosi xewiri: qurtulmush paytext enqerediki türkiye – yaponiye fondi medeniyet merkizide ötküzülgen «2018 – yilliq yaponiye féstiwali» ning échilish murasimida qilghan sözide, türkiye bilen yaponiyening eneniwi qimmet ölchemlirige, aile qurulmisi, ammiwi munasiwetliri jehettin oxshashliqlargha ige ikenlikini eskertish bilen bir waqitta, ikki dölet otturisidiki oxshashliqlarning ikki dölet xelqining bir – birini söyüsh we bir - birige hésdashliq qilishida muhim rol oynighanliqini, yéqin tarixta ikki döletning özara yéqinlishishida türtkilik rol oynighan türlük amilarning barliqini qeyt qildi.
2018 – yilning xitayda «türkiye yili» süpitide tebriklinidighanliqini tekitligen qurtulmush mundaq dep körsetti: «aldimizdiki yil yaponiyede türkiye yili élan qilinidu. 2013 – yilimu türkiye yili élan qilinghan idi. aridin birqanche yil ötkendin kéyin tekrar yaponiyede türkiye yili élan qilish xizmiti ishlewatimiz.»
türkiyening yaponiye bilen iqtisadiy jehettinmu munasiwiti barliqini eskertken qurtulmush, yapon karxanichilarning hemishe türkiyening chong – chong layihelirige köngül bölgenlikini hemde türkiye bilen her sahede istiratégiyelik hemrahliq ornatqanliqini qeyt qildi.
yaponiye dölet ishliri ministiri masaji matsuyamaning yaponiye féstiwali dairiside kino, hösnxetke oxshighan medeniyitini tonushturush meqsitide köpligen paaliyetlerning ötküzülüshining mölcherliniwatqanliqini éytqanliqini eskertken qurtulmush, bu paaliyetlerning wasitisi arqiliq türkiye xelqining yaponiye medeniyiti bilen tonushushi we yaponiyeni ziyaret qilishidin xursen bolidighanliqlirini tekitlep mundaq dédi: «putbolda yaponiyege wekillik qilidighan yuto nagatomoning galatasaray komandisigha yötkilishi munasiwiti bilen yaponiyede türkiyege köngül bölüsh yenimu yüksek sewiyege yétidu dep qaraymen.»
féstiwalning échilish murasimigha türkiye – yaponiye fondining bashliqi tayyar sadiqlar bilen yaponiyening enqere bash elchisi akio miyajima we bashqa méhmanlar teklip bilen qatnashti.
murasimda muzika konsértidin sirt yene, yaponiye medeniyiti eks ettürülgen nomurlarmu orundaldi.
