ömer chelik: türkiye daéshni yawropa chégraliridin yolup tashlidi
yawropa ittipaqi ishliri ministiri we bash muzakirichi ömer chelik «yawropa ittipaqigha eza bolush türkiyege nisbeten bir dölet istratégiyesidur» dédi.
türkiye awazi radiyosi xewiri: yawropa ittipaqi ishliri ministiri we bash muzakirichi ömer chelik türkiyening térrorluq teshkilati daéshni yawropa chégraliridin yolup tashlighanliqini éytti.
ömer chelik adanada jeyhan soda uyushmisini ziyaret qilish esnasida türkiyening aldidiki eng muhim küntertiplerdin birsining térrorluqqa qarshi küresh ikenlikini bildürdi. türkiyening héchqandaq ittipaqdishi bilen selibiy munasiwette bolush arzusi yoqluqini tekitlidi we ötkenki mezgillerde bezi ittipaqdashlarning térrorluq mesiliside qosh ölchemlik muamile qilghanliqini eskertti.
térrorluq teshkilati p k k ning oxshash bolmighan yawropa döletliridiki paaliyetlirini uzun yillardin béri yaxshi bilidighanliqini éytqan ömer chelik, bolupmu gérmaniyege oxshash döletlerde alahide teshkiliy qurulmilirining barliqini tekitlidi.
ömer chelik türkiyening öz dalet menpeeti nuqtisidin yawropa ittipaqigha eza bolushni xalighanliqini tekitlep, «yawropa ittipaqigha eza bolush türkiyege nisbeten bir dölet istratégiyesidur. biraq bu yerde biterep heqqiqetni asas qilghan munasiwet bolushi lazim. yawropa ittipaqining bashqa döletke ayrim ölchem ishlitip, türkiyege yene bashqiche ölchem ishlitishke oxshash pozitsiyesini qetiy qobul qilalmaymiz. türkiye yawropagha méhman emes» dédi.
