erdoghan istanbul pul - muamile merkizini xizmetke kirishtürüsh murasimida söz qildi

türkiye awazi radiyosi xewiri: jumhur reis erdoghan istanbul pul - muamile merkizining échilish murasimidiki sözide,  6 - féwraldiki yer tewresh apitige qarimay, meblegh sélish we tereqqiyat herikitini tézletkenliklirini tekitlep: «biz xelqimizni arzulirigha yetküzüshni dawamlashturmaqtimiz. bügünmu pul – muamile saheside türkiyeni téximu yuqiri pellige kötüridighan istanbul pul - muamile merkizining échilghanliqidin hayajanliniwatimiz» dédi.

yer shari pul - muamile éghirliq merkizining künséri gewdilik halette gherbtin sherqqe qarap buruluwatqanliqigha isharet qilghan erdoghan, tarixta sherq bilen gherb otturisida jughrapiyelik we soda köwrüki rolini oynghan istanbulning pul - muamile bazirliri otturisidimu köwrüklük rol oynighanliqini éytti.

özlirining istanbulni dunyaning aldinqi qatardiki pul - muamile merkezlirining birige aylandurghanliqlirini tekitligen erdoghan: «istanbul tarixta qandaq bu döletning pul - muamile merkizi bolghan bolsa, hazirmu qaytidin pul - muamile merkizi bolush wezipisini üstige alidu» dédi.

u istanbul pul - muamile merkizining türkiyeni yer shari pul - muamile merkizige aylandurushni nishan qilghan yiraqni körer tür ikenlikini eskertti we sözini dawamlashturup: «istanbul pul - muamile merkizimizning omumiy kölimi 1 milyon 400 ming kiwadrat métir bolup, u 21 ishxana binasi, 100 ming kiwadrat métirliq soda merkizi, 2100 kishilik qurultay merkizi, méhmanxana we 26500 aptombil sighidighan eqliy iqtidarliq sheher modéli qatarliq her xil alahidiliki bilen soda dunyasining barliq éhtiyajini qanduridu» dégenlerni qeyt qildi.