تۈركىيە پەلەستىن ئىقتىسادىنىڭ گۈللىنىشىگە يېقىندىن ياردەمچى بولماقتا

تۈركىيە ئاۋازى رادىيوسى خەۋىرى: ساباھاددىن تارھان، ئىشغال ئاستىدىكى ئىيوردان دەرياسىنىڭ غەربىي قىرغىقىنىڭ نابلۇس شەھىرىدىكى نابلۇس شەھەرلىك سودا – سانائەت باشقارمىسىنى زىيارەت قىلغاندا سۆز قىلىپ، «تۈركىيە، پەلەستىن مەھسۇلاتلىرىغا بازار يارىتىش، پەلەستىن شىركەتلىرىنىڭ بىۋاسىتە ھالدا تۈرك شىركەتلىرى بىلەن ئالاقە ئورنىتىشىنىڭ ئاساسىنى بەرپا قىلىش، سودا – سانائەتچىلەرگە كۆپ قېتىم كىرىپ – چىقىشقا بولىدىغان ۋىزا بېرىش ۋە پەلەستىن شىركەتلىرىنىڭ تۈركىيەدە ئېچىلىدىغان يەرمەنكىلەرگە قاتنىشىشىنى كاپالەتكە ئىگە قىلىش دېگەندەك ئۇسۇللار ئارقىلىق پەلەستىن ئىقتىسادىغا ياردەم بېرىشكە تىرىشىۋاتىدۇ» دېدى.

نابلۇس شەھەرلىك سودا – سانائەتچىلەر باشقارمىسى ئىجرائىيە ئىشلىرى رەئىسى ئۆمەر ھاشىممۇ، ئىككى دۆلەت ئوتتۇرىسىدىكى سودا ھەجىمىنىڭ يۇقىرى كۆتۈرۈلۈشىنىڭ ھەر ئىككى تەرەپكە پايدىلىق ئىكەنلىكىنى تەكىتلەپ ئۆتتى.

تۈركىيە بىلەن پەلەستىن ئوتتۇرىسىدا 2004 – يىلى ئىمزالانغان ئەركىن سودا كېلىشىمى سايىسىدا، ئىككى دۆلەت ئوتتۇرىسىدىكى سودا ھەجىمى يىللىق 657 مىليون دوللارغا يەتكەنىدى.