riyad bilen islamabad 20 milyard dollar qimmitige ige sélinma kélishimi imzalidi

türkiye awazi radiyosi xewiri: pakistanda ikki künlük dölet ishliri ziyaritide bolghan seudi erebistan text warisi shahzadisi muhemmed bin selman bilen pakistan bash ministiri imran xanning ishtirak qilishi bilen kélishim imzalash murasimi ötküzüldi.

shahzade muhemmed bin selman paytext islamabadtiki murasimda söz qilip, text warisi bolghan 2017 – yilidin buyanqi tunji resmiy dölet ishliri ziyaritini pakistangha qaratqanliqini eskertip, bu yerge sélinidighan seudi erebistan sélinmilirining her ikki dölet üchün muhim ikenlikini qeyt qildi.

ikki döletning sayahetchilik sahesige meblegh sélish toghrisidimu kélishimlerni tüzidighanliqini bildürgen shahzade muhemmed bin selman, 2030 – yilidin kéyin sayahetchi sanini özara 50 milyongha yetküzüshni xalaydighanliqlirini éytti.

imran xan bolsa, sayahetchilik we néfitximiye saheside téximu küchlük hemkarliq ornitishqa teyyar ikenliklirini eskertip, pakistanliq hajilarning seudi erebistan seperliri we wiza resmiyetlirining qolaylashturulushini, seudi erebistan türmiliridiki 3 mingdin artuq pakistan puqrasining qoyup bérilishini telep qildi.

ikki rehberning sözliridin kéyin ötküzülgen murasimda néfitximiye, kanchiliq, chekkilesh, énérgiye ishlepchiqirish, qayta hasil bolidighan énérgiye qurulushliri, mulazimet sahesi, yashlar we tenterbiye saheliri boyiche 20 milyard dollarliq kélishim imzalandi.