amérikining iran émbargosi türkiye waqti saet 07:00 étibaren ijra qilinishqa bashlidi

türkiye awazi radiyosi xewiri: amérika qoshma ishtatlirining irangha yürgüzgen iqtisadiy émbargolirining birinchi basquchi bügün etigen türkiye waqti saet 07:00 din étibaren ijra qilinishqa bashlidi.

néfit sodisigha alaqidar cheklimiler noyabir éyida ijra qilinishqa bashlinidu.

iranning amérika dollirigha érishishini, dölet zayomi sétishini, altun we bashqa qimmet bahaliq kan mehsulatliri bilen polat, alyumin, kömür dégendek métallar bilen soda qilishini we yoluchilar ayropilani yaki saymanlirini import qilishini meni qilishni mezmun qilghan jaza pilani washington waqti 00:00, türkiye waqti 07:00 din étibaren ijra qilinishqa bashlidi.

buningdin bashqa, chet el shirketlirining iranning aptomobil sahesige kirishining aldini alidighan chare – tedbirler, qolda ishlengen gilem we sham (demeshiq) yangiqigha oxshash yimeklik mehsulatlirining amérika qoshma ishtatlirigha éksport qilinishimu émbargo qatarigha kirgüzüldi.

iran emgek ishliri ministiri eli rebii, «émbargolar yüzisidin 1 milyongha yéqin iranliqning ishsiz qélish éhtimali bar» liqini eskertip, amérikining bir tereplime halda tashlighan bu qedimining irangha éghir ziyan élip kélidighanliqigha isharet qildi.

yene bir tereptin amérika dairiliri, émbargolarning iran bilen soda qilishni dawamlashturghan bashqa döletlernimu öz ichige alidighan shekilde ijra qilinidighanliqi üchün, bu émbargolar üchinchi döletlergimu selbiy tesir körsitishi mumkin.

amérika xezine ishliri ministirliqi, bashqa döletlerning émbargolar tüpeyli uchrighan ziyanlirigha tölem bérilmeydighanliqini élan qilghanidi.

iranning yadro pilanigha alaqidar keng dairilik ortaq heriket pilani 20 ay dawamlashqan söhbetlerdin kéyin, 2015 – yili iyulda üstelning bir teripide iran, yene bir teripide b d t  xewpsizlik kéngishining 5 daimiy ezasi (engliye, amérika qoshma ishtatliri, xitay, firansiye, rusiye) we gérmaniye bilen yawropa ittipaqi wekilliri olturghan halda imzalanghanidi.

kélishim, téhranning yadro pilanidin waz kéchishi bedilige bu döletke yürgüzülüwatqan xelqara émbargolarning bikar qilinishini mezmun qilatti. biraq, may éyida amérika qoshma ishtatliri pirézidénti donald trampning yadro kélishimidin chékinishni qarar qilishi bilen, amérika xezine ishliri ministirliqi irangha émbargolarning 90 we 180 künlük ikki basquch boyiche qaytidin yürgüzülüshke bashlinidighanliqini uqturghanidi.