amérika bilen yawropa ittipaqi soda mesililiri toghrisida kélishti

türkiye awazi radiyosi xewiri: aqsarayda uchrashqan tramp bilen jankér ünümlük axirlashqan yighindin kéyin qoshma muxbirlarni kütüwélish yighini ötküzdi.

amérika – yawropa ittipaqi munasiwetliride yéngi bir sehipe échishni közlep uchrishish ötküzgenliklirini eskertken donald tramp, «shunga bügün yawropa ittipaqi bilen aptomobildin bashqa sanaet mehsulatlirigha qoyulghan baj, qoshumche baj we toluqlima puli qatarliqlarni nölge chüshürüshke urunush toghrisida birdeklik hasil qilduq» dédi.

tramp, ximiyelik we yéza – igilik mehsulatlirigha qoyulghan soda tosuqlirini azaytish toghrisidimu birdeklik hasil qilghanliqlirini qeyt qildi we amérikiliq déhqanlargha, yawropa ittipaqining qisqa waqit ichide amérikidin purchaq import qilishni bashlaydighanliqining xushxewirini berdi.

bu qedemlerning amérika qoshma ishtatliri bilen yawropa ittipaqi arisidiki sodini téximu adil haletke keltüridighanliqini tekitligen amérika pirézidénti tramp, yawropa ittipaqi amérikidin köp miqdarda suyuqlandurulghan tebiiy gaz sétiwalidighanliqinimu sözlirige ilawe qildi.

jankér bolsa, amérika qoshma ishtatliri bilen yawropa ittipaqining aptomobildin bashqa sanaet mehsulatlirining import qilinishi yolidiki tosuqlarni pütünley élip tashlash toghrisida birdeklik hasil qilinghanliqini, buning özining eng muhim nishanlirining biri ikenlikini tekitlidi.

jankér yene, énérgiye sahesidiki hemkarliqni kücheytish toghrisidimu kélishkenliklirini bildürüp, «amérika qoshma ishtatliridin téximu köp suyuqlandurulghan tebiiy gaz sétiwalimiz. bu bashqilar üchünmu bir signal» dédi we sözini dawamlashturup, yawropa ittipaqining amérikidin téximu köp purchaq import qilidighanliqini tekitlidi.

amérika bilen yawropa ittipaqining xelqara soda ölchemlirige alaqidar mesililerdimu hemkarliq ornitidighanliqini bildürgen jankér, dunya sehiye teshkilatining qaytidin tertipke sélinishi yolida birlikte heriket qilishqa qarar qilghanliqlirinimu eskertti.

yawropa ittipaqi komitéti bashliqi jankér, tereplerning muzakiriler dawamlishiwatqan jeryanda yirikchilikni éghirlashturuwétidighan qedemlerni tashlashtin yiraq turidighanliqigha isharet qilip, «bular elwette muzakiriler dawamlishiwatqan, tereplerdin biri muzakire ötküzüshtin waz kechmeydighanla bolsa, qoshumche bajlarning toxtitip qoyulushi bilen polat we alyumingha qoyulghan nöwettiki bajlarning közdin kechürülüshi kélishimge baghliqtur» dédi.