soda urushi resmiy bashlidi

türkiye awazi radiyosi xewiri: amérika hökümiti xitaydin import qiliniwatqan 34 milyard dollar qimmitidiki 800din artuq mehsulattin %25 qoshumche tamozhna béji élish belgilimisini bügündin étibaren resmiy yolgha qoyushqa bashlidi.

amérika pirézidénti donald tramp xitay hökümitini «téxnologiye oghrilash we adaletsiz soda siyasiti yolgha qoyush»bilen eyiblep,  xitaydin amérikigha import qilinidighan téxnologiyelik mehsulatlardin 50milyard dollar qoshumche tamozhna béji élish belgilimisi yolgha qoyushni qarar qilghanidi, bügün bu belgilimining deslepki basquchluq qismi washingiton waqti saet 00:01 de resmiy ijra qilinishqa bashlidi.

xitayning mudapie, awiatsiye we ishlepchiqirish sanaitige qaritilghan %25lik qoshumche tamozhna béji élish belgilimisi yadro riaktorliri, gaz turbinliri, hawa we gaz qoyuqlanduridighan mashinilar, doxopkilar we soda kir yuyush mashiniliri bolup jemiy 34 milyard dollar qimmitidiki 818 xil mehsulatni öz ichige alidu.

aqsaray 16 milyard dollar qimmitidiki 300ge yéqin mehsulatni öz ichige alidighan qoshumche tamozhna béji élish belgilimisining ikkinchi qismini bu ayning üchinchi heptisi yol qoyushni pilanlighanliqini uqturdi.

béyjing hökümitiningmu washingiton yolgha qoyushqa bashlighan qoshumche tamozhna béji élish belgilimisige qarshi bügündin bashlap amérika mehsulatliridin qoshumche tamozhna béji élish belgilimisi yolgha qoyushi kütülmekte.

xitay soda ministirliqi bayanatchisi gaw féng, amérika hökümitining xitay mehsulatliridin qoshumche tamozhna béji élish belgilimisini yolgha qoyushi toghrisida toxtilip: xitay hökümiti tunji oqni chiqiridighan terep bolmaydu, biraq amérika qoshumche tamozhna béji élish belgilimisini yolgha qoyghan teqdirde, xitaymu dölet we xelq menpeetini qoghdash üchün heriketke ötüshke mejburdur, dégen mezmunda bayanat berdi.

amérika bilen xitay arisida soda urushining muqeddimisi süpitide körülgen bu özgirishler, tramp hökümitining bu yil martta chet eldin import qilinidighan polat-tömür we aliyuminlardin qoshumche tamozhna béji élish belgilimisini yolgha qoyidighanliqini jakarlishi bilen bashlighanidi.