Moody's: amérikining siyasiti xitayning iqtisadigha ziyan yetküzidu

türkiye awazi radiyosi xewiri: Moody's teripidin bu heqte élan qilinghan bayanatta, amérika qoshma ishtatliri pirézidénti donald tramp imzalighan we xitay mehsulatliridin qoshumche tamozhna béji élish we xitayning amérikidiki shirketlirige émbargo yürgüzüsh qararnamisi heqqide melumat bérildi.

bayanatta, amérika qoshma ishtatlirining xitay mehsulatliridin qoshumche tamozhna béji élishning dairisini kéngeytken teqdirde, buning xitay iqtisadini ziyangha uchritish tesirining cheklik bolidighanliqi eskertilish bilen bir waqitta, mundaq déyildi: «eger amérika qoshma ishtatliri xitay mehsulatliridin qoshumche tamozhna béji élish we amérikidiki xitay shirketlirige émbargo yürgüzüsh pilanining dairisini kéngeytse, bu xitayning iqtisadiy tereqqiyatigha we muhim pul – muamile organlirigha selbiy tesir körsitidu.»

xitayning amérika qoshma ishtatlirigha muhim miqdarda éksport qilidighan mehsulatliri arisida yaghachtin yasalghan buyumlar, öy jahazliri, ishxana üsküniliri, aile seremjanliri, éléktrlik üsküniler, yollarda ishlitilidighan aptomashinilar, télégraf üsküniliri, générator, kiyim – kéchek, kesh, haywanat méyi  qatarliqlarni öz ichige alidighanliqi eskertilgen bayanatta, buning amérika qoshma ishtatlirining xitaydin qilidighan import ichidiki ülüshining % 15 – 30 iini teshkil qilidighanliqi qeyt qilindi.

bayanatta, télégraf üsküniliri, ishxana we éléktr üskünilirining bultur xitayning amérika qoshma ishtatlirigha qilghan éksportining üchtin biridin köprekini teshkil qilidighanliqi bildürüldi.

amérika qoshma ishtatliri soda siyasetliride mudapie xaraktérlik tedbirlerni kücheytken teqdirde, bashqa döletlerningmu amérikigha qarita intiqam élish siyasetlirini yolgha qoyush éhtimalliqining yuqiriliqi qeyt qilinghan bayanatta, buning netijiside asiya ellirining iqtisadiy we pul – muamile jehettin ziyangha uchraydighanliqi tekitlendi.